జిల్లాలో 2026–28 సంవత్సరాలకు సంబంధించిన మీడియా అక్రిడేషన్ కార్డుల కోసం ఆన్‌లైన్‌లో దరఖాస్తు చేసుకున్న వారిలో కొందరు ఇతర సంస్థలు, ప్రభుత్వ శాఖలు, ప్రజాప్రతినిధుల కార్యాలయాల్లో ఉద్యోగాలు నిర్వహిస్తూ జర్నలిస్టులుగా దరఖాస్తు చేసినట్లు జిల్లా పౌర సంబంధాల కార్యాలయం వెల్లడించింది.

ప్రభుత్వ నిబంధనల ప్రకారం ప్రతిరోజూ క్రియాశీలకంగా మీడియా రంగంలో పనిచేసే జర్నలిస్టులకే అక్రిడేషన్ కార్డులు జారీ చేస్తారని స్పష్టం చేసింది. ఇతర ఉద్యోగాలు చేస్తూ తప్పుడు వివరాలతో దరఖాస్తు చేయడం చట్టవిరుద్ధమని పేర్కొంది.

ఇలాంటి వారిపై చీటింగ్ కేసులు నమోదు చేయడంతో పాటు చట్టపరమైన చర్యలు తీసుకునే అవకాశం ఉందని హెచ్చరించింది. అలాగే వారు పనిచేస్తున్న ప్రభుత్వ లేదా ఇతర సంస్థల్లో సస్పెన్షన్ వంటి చర్యలు ఎదుర్కోవాల్సి రావచ్చని తెలిపింది.

అక్రిడేషన్ కోసం తప్పుడు వివరాలతో దరఖాస్తు చేసిన వారు స్వచ్ఛందంగా ముందుకు వచ్చి జిల్లా పౌర సంబంధాల అధికారి కార్యాలయంలో తమ దరఖాస్తులను వెంటనే ఉపసంహరించుకోవాలని సూచించింది. లేనిపక్షంలో జిల్లా కలెక్టర్ దృష్టికి తీసుకెళ్లి చట్టపరమైన చర్యలు చేపడతామని పీఆర్‌వో కార్యాలయం హెచ్చరించింది.