సూర్యాపేట పట్టణంలో ప్రేమ వ్యవహారం విషాదాంతానికి దారి తీసిన ఘటన కలకలం రేపింది. ప్రియురాలు దూరం పెడుతోందన్న అనుమానంతో గురువారం ఓ యువకుడు ఆమెపై సుత్తితో దాడి చేసిన సంఘటన వెలుగులోకి వచ్చింది. స్నేహనగర్‌లో నివాసం ఉంటున్న యువతి ఇంట్లోకి వెళ్లిన నిందితుడు ఆమె తలపై సుత్తితో దాడి చేశాడు. తీవ్ర గాయాలపాలైన యువతిని స్థానికులు వెంటనే ప్రభుత్వ ఆసుపత్రికి తరలించారు. అక్కడ పరిస్థితి విషమంగా ఉండటంతో మెరుగైన చికిత్స కోసం హైదరాబాద్‌కు తరలించినట్లు సమాచారం. దాడి అనంతరం పారిపోడానికి ప్రయత్నించిన నిందితుడిని స్థానికులు పట్టుకుని స్థంభానికి కట్టి పోలీసులకు అప్పగించారు. ఈ ఘటనపై కేసు నమోదు చేసి దర్యాప్తు చేపట్టినట్లు తెలిసింది. యువతి, యువకుడు ఇద్దరూ సమీప గ్రామాలకు చెందినవారని, గత ఎనిమిదేళ్లుగా పరిచయం ఉన్నట్లు సమాచారం. ఇటీవల కొంతకాలంగా యువతి సూర్యాపేటలో ఒంటరిగా నివాసం ఉంటున్నట్టు తెలిసింది. ఘటనపై పోలీసులు పూర్తి వివరాలు సేకరిస్తున్నారు.