పదోసారి మొబైల్ ఫోన్ రికవరీ మేళా – రూ.22 లక్షల విలువైన 107 ఫోన్లు బాధితులకు అందజేత

జిల్లా పోలీసుల కృషితో మరోసారి ప్రజల ఆస్తులు యజమానుల చేతుల్లోకి చేరాయి.సూర్యాపేట జిల్లా పరిధిలో పోగొట్టుకున్న, చోరికి గురైన సుమారు రూ.22 లక్షల విలువ గల 107 మొబైల్ ఫోన్లను గుర్తించి రికవరీ చేసి బాధితులకు అందజేశారు. ఇది జిల్లాలో పదోసారి నిర్వహించిన మొబైల్ ఫోన్ రికవరీ మేళా కావడం విశేషం. శుక్రవారం జిల్లా పోలీస్ కార్యాలయంలో ఏర్పాటు చేసిన కార్యక్రమంలో జిల్లా ఎస్పీ కె. నరసింహ ఐపిఎస్ బాధితులకు మొబైల్ ఫోన్లను స్వయంగా అందజేశారు. ఈ సందర్భంగా ఆయన మాట్లాడుతూ, ప్రస్తుత కాలంలో మొబైల్ ప్రతి ఒక్కరి నిత్యావసర వస్తువుగా మారిందన్నారు. సమాచార మార్పిడి, ఆన్‌లైన్ విద్య, ఆర్థిక లావాదేవీలు వంటి అనేక అవసరాలకు మొబైల్ కీలకమైందని తెలిపారు.

సంవత్సరంలో 1430 ఫోన్ల రికవరీ

జిల్లాలో ప్రతి నెల వందకు పైగా మొబైల్ ఫోన్లను రికవరీ చేస్తున్నామని, గత సంవత్సరంలో మొత్తం 1430 మొబైల్ ఫోన్లను బాధితులకు అందించామని వెల్లడించారు. ఒక్కో ఫోన్ రికవరీ చేయడానికి సైబర్ యోధులు, సాంకేతిక బృందం, పోలీస్ సిబ్బంది తీవ్రంగా శ్రమించినట్లు తెలిపారు. బీహార్, ఒడిశా, జార్ఖండ్ వంటి ఇతర రాష్ట్రాల నుండి కూడా ఫోన్లను తిరిగి సాధించామని చెప్పారు.

మొబైల్ పోగొట్టుకుంటే వెంటనే నమోదు చేయాలి

మొబైల్ పోగొట్టుకున్నా, చోరికి గురైనా వెంటనే కేంద్ర పరికర గుర్తింపు వేదికలో నమోదు చేసి, సంబంధిత పోలీస్ స్టేషన్‌లో సమాచారం ఇవ్వాలని సూచించారు. ఫోన్‌ను నిలిపివేయడం ద్వారా వ్యక్తిగత సమాచారాన్ని రక్షించుకోవచ్చని చెప్పారు.

సైబర్ మోసాలపై అప్రమత్తం

మొబైల్ కేంద్రంగా సైబర్ మోసాలు పెరుగుతున్నాయని హెచ్చరించారు. బలహీన రహస్య సంకేతాలను ఛేదించి డబ్బులు కాజేస్తున్న ఘటనలు జరుగుతున్నాయని తెలిపారు. తక్కువ వడ్డీకి రుణాలు, బహుమతులు వచ్చాయని, కేసుల నుంచి తప్పిస్తామని చెప్పి మోసగాళ్లు డబ్బులు అడిగితే నమ్మవద్దని స్పష్టం చేశారు. “డిజిటల్ అరెస్ట్” అనే పేరుతో మోసం చేస్తున్నారని, అలాంటి వాటిని నమ్మరాదన్నారు.

ఫ్రెండ్లీ పోలీస్ – సామాన్యుల కోసమే

పోలీసు శాఖ ప్రజల భద్రతలో కృతనిశ్చయంతో పని చేస్తుందని, కానీ నేరాలకు పాల్పడే వారికి ఫ్రెండ్లీ పోలీస్ ఉండదని హెచ్చరించారు. ప్రతి పౌరుడు యూనిఫాం లేని పోలీస్‌లా సమాజంలో జరుగుతున్న అక్రమాలు, అసాంఘిక చర్యలపై సమాచారం ఇవ్వాలని పిలుపునిచ్చారు. సమాచారం ఇచ్చిన వారి వివరాలు గోప్యంగా ఉంచుతామని హామీ ఇచ్చారు.

రోడ్డు భద్రతపై అవగాహన

రోడ్డు ప్రమాదాల నివారణ కోసం “అరైవ్ అలైవ్” కార్యక్రమం ద్వారా విస్తృత అవగాహన కల్పిస్తున్నామని తెలిపారు. వాహనదారులు అత్యంత అప్రమత్తంగా ప్రయాణించి కుటుంబాలను కాపాడుకోవాలని సూచించారు. మొబైల్ ఫోన్లు తిరిగి పొందిన బాధితులు జిల్లా పోలీసులకు కృతజ్ఞతలు తెలిపారు. పోయిన ఫోన్లు తిరిగి దొరకవని భావించిన తమకు పోలీసులు సాంకేతికతను వినియోగించి అందజేయడం ఆనందంగా ఉందన్నారు. ఈ కార్యక్రమంలో ప్రత్యేక విభాగం పరిశీలకులు రామారావు, ఐటి విభాగ సిబ్బంది రాజశేఖర్ తదితరులు పాల్గొన్నారు. జిల్లా పోలీసుల సేవలను ఎస్పీ అభినందించారు.