నారాయణఖేడ్ స్థానిక ప్రతినిధి కృష్ణ:సంక్రాంతి పండుగ సందర్భంగా పిల్లలకు వారం రోజుల సెలవులు రావడంతో, ఎక్కువ మంది పిల్లలు గాలిపటాలు ఎగురేయడానికి బయటకు వెళ్లే అవకాశం ఉంది. ఈ సందర్భంగా తల్లిదండ్రులు మరియు ప్రజలు అత్యంత జాగ్రత్తగా ఉండాలని కంగ్టి పోలీస్ శాఖ తరఫున హెచ్చరిస్తున్నాం.ప్రస్తుతం చైనా మంజా పూర్తిగా నిషేధించబడింది. దీనివల్ల పక్షులకు తీవ్ర గాయాలు కలగడమే కాకుండా, మనుషులకు కూడా ప్రాణాపాయం కలిగే అవకాశం ఉంది. కావున ఎట్టి పరిస్థితుల్లోనూ చైనా మంజాను ఉపయోగించరాదని ప్రజలకు సూచిస్తున్నాం.పిల్లలు బహుళ అంతస్తుల భవనాల పైన గాలిపటాలు ఎగురేస్తున్న సమయంలో కిందకు చూడకుండా పడిపోవడం వల్ల ప్రమాదాలు జరిగే అవకాశాలు ఎక్కువగా ఉన్నాయి. అలాగే భవనాల సమీపంలో ఉన్న విద్యుత్ తీగలపై గాలిపటాలు చిక్కుకున్నప్పుడు, వాటిని తీసేందుకు ప్రయత్నించడం వల్ల విద్యుత్ షాక్‌కు గురై ప్రాణాపాయం కలిగే ప్రమాదం ఉంది. గతంలో మన నారాయణఖేడ్ ప్రాంతంలో ఇలాంటి ఘటనలు జరిగినట్లు గుర్తు చేస్తున్నాం.అదేవిధంగా, పద్దెనిమిది సంవత్సరాల లోపు పిల్లలకు ద్విచక్ర వాహనాలు ఇవ్వడం చట్ట విరుద్ధం. అలా ఇచ్చిన సందర్భాల్లో ఏదైనా ప్రమాదం జరిగితే, సంబంధిత తల్లిదండ్రులపై చట్టపరమైన చర్యలు తీసుకోవడం జరుగుతుంది.కాబట్టి తల్లిదండ్రులు తమ పిల్లలపై నిరంతరం కన్నేసి ఉంచి, వారు ప్రమాదకరమైన పనులు చేయకుండా జాగ్రత్తలు తీసుకోవాలని, పండుగను సురక్షితంగా మరియు ఆనందంగా జరుపుకోవాలని కంగ్టి పోలీస్ శాఖ తరఫున గట్టిగా హెచ్చరిస్తున్నాం.