తెలంగాణ మున్సిపల్ ఎన్నికల్లో విజయం సాధించడమే లక్ష్యంగా భారతీయ జనతా పార్టీ ప్రచారం మరింత ఉధృతమైంది. మహబూబ్‌నగర్ జిల్లాలో జరిగిన భారీ బహిరంగ సభలో బిజెపి జాతీయ అధ్యక్షులు నితిన్ నబీన్ పాల్గొని పార్టీ శ్రేణులకు దిశానిర్దేశం చేయగా, ఆ ప్రసంగాన్ని సూర్యాపేట పట్టణంలోని బిజెపి కార్యాలయంలో ప్రత్యక్ష ప్రసారంగా ప్రదర్శించారు. ఈ కార్యక్రమాన్ని మాజీ శాసనసభ్యులు సంకినేని వెంకటేశ్వరరావు వీక్షించి కార్యకర్తలను ఉత్సాహపరిచారు. 15వ వార్డు బిజెపి అభ్యర్థి తాడూరి జ్యోతి తన వార్డు మహిళలతో కలిసి సభ ప్రసంగాన్ని ఆలకించి, కేంద్ర ప్రభుత్వ పథకాలపై మహిళల్లో విస్తృత ఆదరణ ఉందని తెలిపారు. ఈ సందర్భంగా మాట్లాడిన సంకినేని వెంకటేశ్వరరావు, జాతీయ అధ్యక్షుల పిలుపుతో పార్టీ శ్రేణుల్లో నూతనోత్సాహం నెలకొందని, సూర్యాపేట మున్సిపాలిటీలో కమలం జెండా ఎగరడం ఖాయమని ధీమా వ్యక్తం చేశారు.