సోమందేపల్లి, భారత రాజ్యాంగ నిర్మాత డాక్టర్ బి.ఆర్. అంబేద్కర్ దేశానికి సమానత్వం, స్వేచ్ఛ, సామాజిక న్యాయం కల్పించిన మహోన్నత నాయకుడని తెలుగుదేశం పార్టీ (తెదేపా) నాయకులు పేర్కొన్నారు. మంగళవారం సోమందేపల్లిలోని తెదేపా పార్టీ కార్యాలయంలో అంబేద్కర్ 136వ జయంతి వేడుకలను ఘనంగా నిర్వహించారు.

ఈ సందర్భంగా నాయకులు అంబేద్కర్ చిత్రపటానికి పూలమాలలు వేసి ఘన నివాళులు అర్పించారు. అంబేద్కర్ చూపిన మార్గం ప్రతి ఒక్కరికీ ఆదర్శమని, ఆయన ఆలోచనలు నేటికీ ప్రాసంగికమని కొనియాడారు. రాజ్యాంగ రూపకర్తగా మాత్రమే కాకుండా, అణగారిన వర్గాల అభ్యున్నతికి కృషి చేసిన మహానుభావుడిగా ఆయన సేవలను స్మరించుకున్నారు.

ఈ కార్యక్రమంలో కన్వీనర్ వెంకటేష్, మాజీ ఎంపీటీసీ కిష్టప్ప, మండల తెదేపా ఉపాధ్యక్షులు ఆకుల రమణ, రామాంజి, సజ్జరాయుడు తదితరులు పాల్గొన్నారు. నాయకులు అంబేద్కర్ ఆశయాలను ఆచరణలో పెట్టాలని పిలుపునిచ్చారు.