​* సూర్యాపేట ఎస్పీ కే. నరసింహ చేతుల మీదుగా ఉపాధ్యాయుడికి ఘన సత్కారం

* జడ్పీహెచ్‌ఎస్ చిన్నకొండూరులో దోటి రాములు అండాలుకు ఆత్మీయ వీడ్కోలు

సమాజ నిర్మాణంలో ఉపాధ్యాయుల పాత్ర అత్యంత కీలకమని, విద్యార్థుల భవిష్యత్తుకు బలమైన పునాది వేసే గురువుల సేవలు ఎప్పటికీ చిరస్మరణీయమని సూర్యాపేట జిల్లా ఎస్పీ కే. నరసింహ (ఐపీఎస్) కొనియాడారు. చౌటుప్పల్ మండలం చిన్నకొండూరు జిల్లా పరిషత్ ఉన్నత పాఠశాల లో భౌతికశాస్త్ర స్కూల్ అసిస్టెంట్‌గా సుదీర్ఘ సేవలందించి పదవీ విరమణ చేసిన దోటి రాములు అండాలు ఆత్మీయ వీడ్కోలు సమావేశం మంగళవారం పాఠశాల ఆవరణలో ఘనంగా జరిగింది. ఈ కార్యక్రమానికి ఎస్పీ ముఖ్య అతిథిగా హాజరై, తన పూర్వ గురువును శాలువాతో ఘనంగా సత్కరించారు. ​ఈ సందర్భంగా ఎస్పీ నరసింహ మాట్లాడుతూ.. తనకు విద్యాబుద్ధులు నేర్పిన గురువు ఉద్యోగ విరమణ మహోత్సవంలో ముఖ్య అతిథిగా పాల్గొనడం పూర్వజన్మ సుకృతంగా భావిస్తున్నానంటూ భావోద్వేగానికి లోనయ్యారు. రాములు అండాలు తన సుదీర్ఘ సేవా కాలంలో ఎంతోమంది విద్యార్థులను ఉన్నత శిఖరాలకు చేర్చారని ప్రశంసించారు. అనంతరం పదవీ విరమణ పొందిన దోటి రాములు అండాలు మాట్లాడుతూ.. తన విధి నిర్వహణకు సహకరించిన విద్యాశాఖ అధికారులు, సహచర ఉపాధ్యాయులు, గ్రామ పెద్దలు, విద్యార్థుల తల్లిదండ్రులకు కృతజ్ఞతలు తెలిపారు. ఈ కార్యక్రమంలో పాఠశాల ప్రధానోపాధ్యాయులు, ఉపాధ్యాయ బృందం, ప్రజాప్రతినిధులు, పూర్వ విద్యార్థులు, గ్రామస్థులు పాల్గొని ఉపాధ్యాయ దంపతులను ఘనంగా సన్మానించి శుభాకాంక్షలు అందజేశారు.