ప్రధాన పార్టీలకు సవాల్‌గా ‘తెలంగాణ రాజకీయ కూటమి’ ఆవిర్భావం

తెలంగాణ రాజకీయాల్లో అనూహ్య పరిణామాలు చోటుచేసుకుంటున్నాయి. ఇప్పటివరకు కాంగ్రెస్, భారత రాష్ట్ర సమితి, భారతీయ జనతా పార్టీ మధ్యే రాజకీయ పోరు కొనసాగుతుండగా, ఇప్పుడు వాటికి ప్రత్యామ్నాయంగా మరో రాజకీయ వేదిక రంగప్రవేశం చేయడం రాష్ట్ర రాజకీయాల్లో చర్చనీయాంశంగా మారింది. “తెలంగాణ రాజకీయ కూటమి” పేరుతో ఏర్పడిన ఈ కొత్త వేదిక ప్రధాన పార్టీలకు సవాల్ విసరనుంది. హైదరాబాద్ నగరంలోని బషీర్‌బాగ్ ప్రెస్ క్లబ్ లో నిర్వహించిన విస్తృత స్థాయి చర్చా వేదిక సమావేశంలో ఈ కూటమి ఆవిర్భావాన్ని ప్రకటించారు. రాష్ట్ర వ్యాప్తంగా వివిధ రంగాలకు చెందిన మేధావులు, సామాజిక కార్యకర్తలు, రాజకీయ నాయకులు ఈ సమావేశానికి హాజరయ్యారు. ఈ సందర్భంగా ప్రొఫెసర్ లక్ష్మణ్ మాట్లాడుతూ రాష్ట్రంలో ప్రజల ఆకాంక్షలకు సరైన ప్రతిబింబం కనిపించడం లేదని పేర్కొన్నారు. ప్రత్యామ్నాయ రాజకీయ శక్తి అవసరం ఎంతో కాలంగా ఉందని, ప్రజా సమస్యలపై కేంద్రీకృత రాజకీయ వేదిక అవసరమని వివరించారు.

తెలంగాణ విఠల్ మాట్లాడుతూ ప్రధాన పార్టీల మధ్య పరస్పర విమర్శలు జరుగుతున్నప్పటికీ ప్రజా సమస్యల పరిష్కారంపై స్పష్టత కనిపించడం లేదన్నారు. నిరుద్యోగం, వ్యవసాయ సంక్షోభం, ధరల పెరుగుదల, సామాజిక న్యాయం వంటి అంశాలపై కూటమి ప్రత్యేక దృష్టి సారిస్తుందని తెలిపారు. ప్రొఫెసర్ గాలి వినోద్ రాష్ట్ర రాజకీయాల్లో మూడో శక్తి అవతరించడం ప్రజాస్వామ్యానికి శుభపరిణామమని అభిప్రాయపడ్డారు. ప్రజల ఆశయాలకు అనుగుణంగా విధానాలు రూపొందించే వేదికగా ఈ కూటమి నిలుస్తుందని చెప్పారు. కపిలవాయి దిలీప్ కుమార్ మాట్లాడుతూ రాబోయే ఎన్నికల్లో ప్రధాన పార్టీలకు గట్టి పోటీ ఇవ్వడమే లక్ష్యమని స్పష్టం చేశారు. గ్రామ స్థాయి నుంచి రాష్ట్ర స్థాయి వరకు విస్తృత చర్చలు నిర్వహించి కార్యాచరణ ప్రణాళిక రూపొందిస్తామని వెల్లడించారు.

రాబోయే ఎన్నికలను దృష్టిలో పెట్టుకుని ఈ కూటమి వ్యూహరచన ప్రారంభించింది. ప్రజా సమస్యలపై ఉద్యమాలు, చర్చలు, అవగాహన కార్యక్రమాలు నిర్వహించేందుకు నిర్ణయించుకుంది. వివిధ సంఘాలు, సామాజిక సంస్థలు, యువజన, రైతు, కార్మిక వర్గాల మద్దతు కూడగట్టే దిశగా ప్రయత్నాలు ప్రారంభించనున్నట్లు నాయకులు తెలిపారు. కొత్త కూటమి ఆవిర్భావంతో రాష్ట్ర రాజకీయాల్లో కొత్త సమీకరణాలు ఏర్పడే అవకాశం ఉందని రాజకీయ వర్గాలు విశ్లేషిస్తున్నాయి. ప్రధాన పార్టీలకు ఇది ఎంతవరకు ప్రభావం చూపుతుందో రాబోయే రోజుల్లో స్పష్టత వచ్చే అవకాశముంది. ప్రస్తుతం మాత్రం తెలంగాణ రాజకీయాల్లో ఆసక్తికర వాతావరణం నెలకొంది.