శ్రీ సత్యసాయి జిల్లాలోని ఎస్సీ, ఎస్టీ,బీసీ,గురుకుల హాస్టళ్లలో పనిచేస్తున్న నాలుగవ తరగతి ఉద్యోగులు అనగా స్వీపర్లు, వాచ్‌మెన్‌లకు ఐదు నెలలుగా పెండింగ్‌లో ఉన్న జీతాలను వెంటనే చెల్లించాలని ఆంధ్రప్రదేశ్ రాష్ట్ర నాలుగవ తరగతి ఉద్యోగుల సంఘం డిమాండ్ చేసింది. ఈ మేరకు సోమవారం పుట్టపర్తి కలెక్టరేట్‌లో నిర్వహించిన పీజీఆర్ఎస్‌లో ఆ సంఘం రాష్ట్ర గౌరవ అధ్యక్షులు కోటకొండ కృష్ణప్ప, జిల్లా అధ్యక్షులు ఎం.మల్లేష్ తదితర నాయకులతో కలిసి జిల్లా కలెక్టర్ శ్యాంప్రసాద్‌కు వినతిపత్రం అందజేశారు. ఈ సందర్భంగా వారు మాట్లాడుతూ హాస్టళ్లలో రాత్రింబవళ్లు పనిచేస్తున్న పేద స్వీపర్లు, వాచ్‌మెన్‌లకు 5 నెలలుగా జీతాలు ఇవ్వకపోవడం దారుణమన్నారు సమాన పనికి సమాన వేతనం ఇవ్వాలన్న నిబంధనను రాష్ట్ర ప్రభుత్వమే తుంగలో తొక్కుతోందని ఆవేదన వ్యక్తం చేశారు. వెంటనే పెండింగ్ జీతాలు విడుదల చేయకపోతే ఆందోళన బాట పడతామని హెచ్చరించారు.

*మే 30న జిల్లాస్థాయి సమావేశానికి పిలుపు*

అదేవిధంగా మే 30వ తేదీన పుట్టపర్తిలోని బీసీ బాయ్స్ హాస్టల్‌ నందు నాలుగవ తరగతి ఉద్యోగుల సంఘం ఆధ్వర్యంలో జిల్లా స్థాయి సమావేశం నిర్వహిస్తున్నట్లు ఆ సంఘం జిల్లా అధ్యక్షుడు మల్లేష్ తెలిపారు. జిల్లాలోని సంక్షేమ హాస్టళ్లలో పనిచేస్తున్న వర్కర్లు అందరూ ఈ సభకు హాజరై విజయవంతం చేయాలని పిలుపునిచ్చారు.ఈ కార్యక్రమంలో ఏపీ 4వ తరగతి ఉద్యోగుల సంఘం జిల్లా ప్రధాన కార్యదర్శి ఇదాయతుల్లా, వర్కింగ్ ప్రెసిడెంట్ సూర్యనారాయణ, ఉపాధ్యక్షులు శంకర్ నాయక్ తదితరులు పాల్గొన్నారు.