దేశ భవిష్యత్తును ప్రశ్నార్థకంగా మారుస్తున్న మోడీ విధానాలు

రామన్నపేట.

కేంద్ర ప్రభుత్వ ప్రజా–కార్మిక వ్యతిరేక విధానాలకు వ్యతిరేకంగా దేశవ్యాప్తంగా చేపట్టిన సార్వత్రిక సమ్మె రామన్నపేట మండల కేంద్రంలో విస్తృతంగా జరిగింది. సీఐటీయూ మరియు ఇతర ప్రజాసంఘాల ఆధ్వర్యంలో నిర్వహించిన ఈ సమ్మెలో అనేక రంగాల కార్మికులు పాల్గొని అనంతరం భారీ ర్యాలీ నిర్వహించారు.ఈ సందర్భంగా రైతు సంఘం జిల్లా అధ్యక్షుడు మేక అశోక్ రెడ్డి, వ్యవసాయ కార్మిక సంఘం జిల్లా ఉపాధ్యక్షుడు జల్లెల పెంటయ్య, సీఐటీయూ జిల్లా ఉపాధ్యక్షుడు గొరిగె సోములు మాట్లాడుతూ దేశ భవిష్యత్తును కార్పొరేట్ సంస్థలకు తాకట్టు పెడుతూ కార్మిక, కర్షక వర్గాల భవితవ్యాన్ని ప్రశ్నార్థకంగా మారుస్తున్నారని కేంద్ర ప్రభుత్వంపై విమర్శలు గుప్పించారు.మోడీ ప్రభుత్వం అధికారంలోకి వచ్చిన తర్వాత కార్పొరేట్ సంస్థలకు ప్రాధాన్యం ఇస్తూ కార్మిక వర్గాన్ని నిర్వీర్యం చేస్తోందన్నారు. స్కీమ్ వర్కర్లు తక్కువ వేతనాలతో పని చేస్తూ ఇబ్బందులు పడుతున్నారని ఆవేదన వ్యక్తం చేశారు. లేబర్ చట్టాలను రద్దు చేసి నాలుగు లేబర్ కోడ్లుగా మార్చడం ద్వారా కార్మిక హక్కులను బలహీనపరిచారని విమర్శించారు. ఉపాధి హామీ చట్టాన్ని నిర్వీర్యం చేసే ప్రయత్నాలు జరుగుతున్నాయని ఆరోపించారు.

ప్రజా, కార్మిక, రైతు వ్యతిరేక విధానాలను ప్రభుత్వం ఉపసంహరించుకోకపోతే పోరాటాలు మరింత ఉధృతం అవుతాయని హెచ్చరించారు. దేశవ్యాప్తంగా ప్రజలు స్వచ్ఛందంగా సమ్మెలో పాల్గొనడం కేంద్ర ప్రభుత్వానికి గట్టి హెచ్చరిక అని పేర్కొన్నారు.

ఈ కార్యక్రమంలో సీఐటీయూ జిల్లా నాయకులు బొడ్డుపల్లి వెంకటేశం, నకిరేకంటి రాము, మామిడి వెంకట్ రెడ్డి, వనం ఉపేందర్, బలుగూరి అంజయ్య, గురుకు లలిత, కందుల హనుమంతు, బోయిని ఆనంద్, బావండ్లపల్లి బాలరాజు, గాదె కృష్ణ, గాదె ఎల్లయ్య, మునికుంట్ల లెనిన్, బుడ్డా ప్రసాద్, శానగొండ రాము, మెట్టు శ్రవణ్ కుమార్, గుండాల ప్రసాద్, గోగు లింగస్వామి, మొటే అంజయ్య, చిట్టి మల్ల శేఖర్, మేడి వీరయ్య తదితరులు పాల్గొన్నారు.