తెలంగాణ రాజకీయాల్లో మరోసారి చర్చనీయాంశంగా మారిన వ్యాఖ్యలు చేశారు మాజీ మంత్రి జీవన్ రెడ్డి . ప్రస్తుత ప్రభుత్వంపై తీవ్ర అసంతృప్తిని వ్యక్తం చేస్తూ, వచ్చే రెండేళ్లలోనే రేవంత్ రెడ్డి ప్రభుత్వం వెళ్లిపోవాలని వ్యాఖ్యానించడం రాజకీయ వర్గాల్లో కలకలం రేపుతోంది.జీవన్‌ రెడ్డి మాట్లాడుతూ, తన భవిష్యత్‌ రాజకీయ దిశపై కీలక నిర్ణయం తీసుకునే దశలో ఉన్నానని తెలిపారు. “ఏ పార్టీలో చేరాలో వారం రోజుల్లో స్పష్టంగా ప్రకటిస్తాను” అని పేర్కొన్నారు. తన నిర్ణయం వ్యక్తిగతంగా కాకుండా, అభిమానులు, మిత్రులు, అనుచరుల అభిప్రాయాల మేరకే ఉంటుందని వెల్లడించారు.

గత రాజకీయ పరిణామాలను ప్రస్తావిస్తూ, రాష్ట్రంలో మార్పు కోసం ఒకప్పుడు కేసీఆర్‌ ఓడిపోవాలని కూడా కోరుకున్నానని ఆయన గుర్తుచేశారు. ఇప్పుడు అదే మార్పు కోసం మరోసారి ప్రజలు ఆలోచించాల్సిన అవసరం ఉందని సూచించారు.జీవన్‌ రెడ్డి తాజా వ్యాఖ్యలు రాజకీయంగా కొత్త సమీకరణాలకు దారితీయవచ్చని విశ్లేషకులు భావిస్తున్నారు. ఆయన తదుపరి అడుగు ఏ దిశలో ఉంటుందో అన్నది రాష్ట్ర రాజకీయాల్లో ఆసక్తికర అంశంగా మారింది.