హుస్నాబాద్,

వడ్ల కొనుగోలులో రైతులను నిలువుదోపిడీ చేస్తూ ప్రభుత్వం చోద్యం చూస్తోందని సిపిఎం జిల్లా కార్యదర్శి ఎండి. జహంగీర్ విమర్శించారు. శుక్రవారం హుస్నాబాద్ పట్టణంలోని ప్రాథమిక సహకార సంఘం వడ్ల కొనుగోలు కేంద్రాన్ని సిపిఎం పట్టణ కమిటీ ఆధ్వర్యంలో సందర్శించారు.

ఈ సందర్భంగా ఆయన మాట్లాడుతూ ప్రభుత్వం రైతుల పట్ల చిత్తశుద్ధి లేకుండా వ్యవహరిస్తోందన్నారు. జిల్లావ్యాప్తంగా వడ్ల కొనుగోలు ప్రక్రియ నిర్లక్ష్యంగా కొనసాగుతోందని ఆరోపించారు. ప్రభుత్వం చెప్పే మాటలకు, చేతలకు పొంతన లేదన్నారు. రెండు నెలలుగా ధాన్యం మార్కెట్ యార్డుల వద్దే నిల్వ ఉండిపోయి రైతులు తీవ్ర ఇబ్బందులు పడుతున్నారని తెలిపారు.

రైస్ మిల్లర్లు ఒక్క లారీ దిగుమతికి ఆరు రోజుల సమయం తీసుకుంటుండటంతో లారీల కొరత ఏర్పడి కొనుగోళ్లు ఆలస్యమవుతున్నాయని పేర్కొన్నారు. వడ్ల కొనుగోలులో మిల్లర్ల యాజమాన్యం ఇష్టారాజ్యంగా వ్యవహరిస్తోందని మండిపడ్డారు. రైతుల సమస్యలను సిపిఎం బృందం ప్రాథమిక సహకార సంఘం చైర్మన్ దృష్టికి ఫోన్ ద్వారా తీసుకెళ్లినట్లు చెప్పారు.

జిల్లాలో రైతాంగం అనేక సమస్యలు ఎదుర్కొంటున్నప్పటికీ అధికారులు రాజకీయ నాయకుల్లా ప్రకటనలు చేయడం తప్ప చర్యలు తీసుకోవడం లేదని విమర్శించారు. కొనుగోళ్లు నిలిచిపోవడంతో వాతావరణ మార్పుల కారణంగా రైతులు ఆందోళన చెందుతున్నారని తెలిపారు. జిల్లాలోని అన్ని వడ్ల కొనుగోలు కేంద్రాల్లో ఇదే పరిస్థితి నెలకొన్నదన్నారు.

రైస్ మిల్లర్లు తమ వైఖరి మార్చుకుని లారీల కొరత లేకుండా చూడాలని, జిల్లా యంత్రాంగం వెంటనే స్పందించి వడ్ల కొనుగోళ్లను వేగవంతం చేయాలని డిమాండ్ చేశారు. రైతాంగ సమస్యలపై అఖిలపక్ష సమావేశం ఏర్పాటు చేయాలని కోరారు. సమస్యలు పరిష్కరించకపోతే జిల్లావ్యాప్తంగా పెద్ద ఎత్తున పోరాటాలు చేపడతామని ప్రభుత్వాన్ని హెచ్చరించారు.

ఈ కార్యక్రమంలో సిపిఎం రాష్ట్ర కమిటీ సభ్యురాలు బట్టుపల్లి అనురాధ, పట్టణ కార్యదర్శి మాయ కృష్ణ, పట్టణ కార్యదర్శివర్గ సభ్యులు వనం రాజు, పట్టణ కమిటీ సభ్యులు వల్దాస్ అంజయ్య, బర్ల వెంకటేష్, నాయకులు వల్దాస్ వెంకటేష్, బండి రవి, రైతులు నరాల బాల నర్సమ్మ, కుచ్చుల హనుమంతు, కుచ్చుల బాలయ్య, జంగప్ప, నరసింహ, కృష్ణ తదితరులు పాల్గొన్నారు.