వాహనదారులకు లయన్స్ క్లబ్ అవగాహన – ట్రాఫిక్ నిబంధనలు తప్పనిసరి

రహదారిపై ప్రయాణించే ప్రతి వాహనదారుడు ట్రాఫిక్ నిబంధనలు పాటిస్తూ తన ప్రాణాలను కాపాడుకోవాలని లయన్స్ క్లబ్ ఆఫ్ చౌటుప్పల్ సేవ అధ్యక్షుడు తిరందాసు జగన్నాథం సూచించారు. బుధవారం పురపాలక కేంద్రంలో లయన్స్ క్లబ్ ఆధ్వర్యంలో రోడ్డు ప్రమాదాల నివారణపై అవగాహన కార్యక్రమం నిర్వహించారు. ట్రాఫిక్ ఎస్ఐ ఆంజనేయులు, సైదిరెడ్డి పాల్గొని వాహనదారులకు పలు సూచనలు చేశారు. హెల్మెట్, సీట్ బెల్ట్ ధరించడం తప్పనిసరి అని, నిర్ణీత వేగ పరిమితులను పాటించాలని తెలిపారు. మలుపుల వద్ద వేగం తగ్గించాలని సూచించారు. మద్యపానం చేసి వాహనం నడపడం వల్ల జరిగే ప్రమాదాలపై అవగాహన కల్పించారు. వాహనం నడుపుతూ మొబైల్ ఫోన్ వినియోగం చేయరాదని హెచ్చరించారు. రోడ్డు ప్రమాదాల నివారణకు పోలీసు, రవాణా శాఖలకు సహకరించాలని కోరారు.ఈ కార్యక్రమంలో లయన్స్ క్లబ్ కార్యదర్శి ఎండి అతహర్ పాషా, కోశాధికారి సిలివేరు మంగయ్య, ట్రాఫిక్ కానిస్టేబుల్ జగన్, హెడ్ కానిస్టేబుల్ వెంకట్ రెడ్డి తదితరులు పాల్గొన్నారు.