నల్లగొండ, స్థానికం:

కేంద్ర ప్రభుత్వం అవలంబిస్తున్న ప్రజా, కార్మిక, రైతు వ్యతిరేక విధానాలకు వ్యతిరేకంగా శుక్రవారం నల్లగొండలోని సుభాష్‌ విగ్రహం వద్ద సిఐటియు, రైతు సంఘం, వ్యవసాయ కార్మిక సంఘాల ఆధ్వర్యంలో నల్లజెండాలతో ఘోర నిరసన చేపట్టారు.

ఈ సందర్భంగా సిఐటియు వ్యవసాయ కార్మిక సంఘం జిల్లా కార్యదర్శి తుమ్మల వీరారెడ్డి, రైతు సంఘం జిల్లా అధ్యక్షులు వీరపల్లి వెంకటేశ్వర్లు మాట్లాడుతూ — “బీజేపీ ప్రభుత్వం రైతాంగం నల్ల చట్టాలను వ్యతిరేకంగా పోరాడిన సమయంలో ఇచ్చిన హామీలను నిలబెట్టకుండా మోసం చేస్తోంది. కనీస మద్దతు ధర చట్టం, విద్యుత్ సవరణ చట్టం ఉపసంహరణ హామీలను తుంగలో తొక్కి, కార్పొరేట్ ప్రయోజనాల దిశగా అడుగులు వేస్తోంది” అని తీవ్రస్థాయిలో విమర్శించారు.

అలా “స్వాతంత్ర్యం ముందు కార్మికులు పోరాడి సాధించిన హక్కులను రద్దు చేసి, నాలుగు కొత్త లేబర్ కోడ్స్ పేరుతో కార్మిక వ్యతిరేక చట్టాలను తీసుకొచ్చింది. వీటిని వెంటనే రద్దు చేయాలి” అని డిమాండ్ చేశారు.

తదుపరి వారు కొనసాగిస్తూ — “వామపక్ష పార్టీల పోరాటాల ఫలితంగా యూపీఏ ప్రభుత్వం ప్రవేశపెట్టిన మహాత్మాగాంధీ జాతీయ ఉపాధి హామీ పథకాన్ని కేంద్ర ప్రభుత్వం విబిజీ రాంజీ చట్టంగా మార్చి రాష్ట్రాలకు నిధులు తగ్గించింది. దీంతో పథకం నిర్వీర్యమై గ్రామీణ కార్మికుల ఉపాధి ప్రమాదంలో పడింది” అని ఆగ్రహం వ్యక్తం చేశారు.

“కేంద్ర ప్రభుత్వం కార్మికులు, రైతులు, వ్యవసాయ కూలీల హక్కులను దెబ్బతీస్తుంది. ఈ ప్రజా వ్యతిరేక చట్టాలను రద్దు చేయకపోతే, జనవరి 19 వరకు గ్రామ గ్రామాన చైతన్య యాత్రలు చేపట్టి, విస్తృత ఉద్యమానికి పిలుపునిస్తాము” అని హెచ్చరించారు.

ఈ కార్యక్రమంలో రైతు సంఘం మహిళా విభాగం రాష్ట్ర కన్వీనర్ కందాల ప్రమీల, సిఐటియు జిల్లా అధ్యక్షులు చినపాక లక్ష్మీనారాయణ, డివైఎఫ్‌ఐ జిల్లా కార్యదర్శి మల్లం మహేష్, మహిళా కూలీల జిల్లా కన్వీనర్ దండెంపల్లి సరోజ, సిఐటియు ఉపాధ్యక్షులు ఎండి సలీం, సహాయ కార్యదర్శి దండెంపల్లి సత్తయ్య, రైతు నాయకులు కుంభం కృష్ణారెడ్డి, అవుట్ రవీందర్, గంజి నాగరాజు, మన్నెం బిక్షం, పోలే సత్యనారాయణ, సర్దార్ అలీ, కట్ట అంజయ్య, బొల్లు రవీందర్, గంజి రాజేష్, ఆవుల అనురాధ, సల్లోజు విష్ణుమూర్తి తదితరులు పాల్గొన్నారు.