స్థానిక ప్రతినిధి

గ్రామాభివృద్ధిపై సమిష్టి కృషికి పిలుపు

ఆత్మకూరు మండలం రైకన్‌పేట గ్రామంలో ఇటీవల జరిగిన గ్రామ పంచాయతీ ఎన్నికల్లో ప్రజల విశ్వాసంతో ఘన విజయం సాధించిన శ్రీమతి సుదగాని కలమ్మ గ్రామ పంచాయతీ సర్పంచ్‌గా ఎన్నికైన సందర్భంగా ఘన సన్మాన కార్యక్రమం జరిగింది. ఈ సందర్భంగా ఉపసర్పంచ్ తాళ్లపల్లి ఉప్పలయ్యతో పాటు ముగ్గురు వార్డు సభ్యులను శాలువాలు కప్పి గౌరవించారు.ఈ కార్యక్రమాన్ని సర్దార్ సర్వాయి పాపన్న గీత కార్మిక సంఘం యాదాద్రి జిల్లా అధ్యక్షుడు పరిటాల రవి ఆధ్వర్యంలో నిర్వహించారు. నూతనంగా ఎన్నికైన ప్రజాప్రతినిధులను అభినందించిన ఆయన, గ్రామాభివృద్ధి మరియు గీత కార్మికుల సంక్షేమం దిశగా నూతన నాయకత్వం సమిష్టిగా పనిచేయాలని ఆకాంక్షించారు.గ్రామంలో మౌలిక వసతుల అభివృద్ధి, పరిశుభ్రత, తాగునీరు, విద్యా–ఆరోగ్య రంగాల బలోపేతంపై ప్రత్యేక దృష్టి సారించి ప్రజలకు మెరుగైన సేవలు అందించాలని సూచించారు. ప్రజల అంచనాలను నెరవేర్చేలా పారదర్శక పాలన అందించాలని పిలుపునిచ్చారు.ఈ సన్మాన కార్యక్రమంలో గ్రామ పెద్దలు, సంఘ నాయకులు, స్థానిక నాయకులు, మహిళలు, యువకులు పెద్ద సంఖ్యలో పాల్గొని కార్యక్రమాన్ని విజయవంతం చేశారు.