డాక్టర్ వూర రామ్మూర్తి యాదవ్

సూర్యాపేట టౌన్, జనవరి :

ప్రజా ప్రతినిధిగా ప్రజల సేవలో తన జీవితాన్ని అంకితం చేసిన మహనీయుడు మాజీ ఎమ్మెల్యే ఉప్పల మల్సూర్ అని సూర్యాపేట పూర్వ విద్యార్థుల మిత్రమండలి గౌరవ అధ్యక్షుడు డాక్టర్ వూర రామ్మూర్తి యాదవ్, అధ్యక్షుడు నల్లకుంట్ల అయోధ్య అన్నారు.

మంగళవారం జిల్లా కేంద్రంలోని జ్యోతిరావు పూలే విగ్రహం వద్ద మాజీ ఎమ్మెల్యే ఉప్పల మల్సూర్ 27వ వర్ధంతి సందర్భంగా ఆయన చిత్రపటానికి పూలమాలలు వేసి నివాళులర్పించారు. అనంతరం వారు మాట్లాడుతూ… సూర్యాపేట నియోజకవర్గం నుంచి నాలుగు సార్లు ఎమ్మెల్యేగా ప్రజల ఆశీర్వాదంతో ఎన్నికై, ప్రజలకు సేవ చేయడమే తన కర్తవ్యంగా నిస్వార్థంగా పనిచేశారని తెలిపారు.

నేటి సమాజంలో ఒక్కసారి ఎమ్మెల్యే అయినా కోట్లు సంపాదించే పరిస్థితులు ఉన్నప్పటికీ, నాలుగు సార్లు ఎమ్మెల్యేగా గెలిచి కూడా కనీసం స్వంత ఇల్లు లేకుండా జీవితం సాగిస్తూ ప్రజల కోసం అంకితభావంతో పనిచేసిన వ్యక్తి ఉప్పల మల్సూర్ అని పేర్కొన్నారు. ఆయన జీవితం నేటి రాజకీయ నాయకులకు, యువతకు ఆదర్శంగా నిలుస్తుందని అన్నారు. జిల్లా కేంద్రంలోని నల్లాల బావి వద్ద ఉప్పల మల్సూర్ విగ్రహం ఏర్పాటుకు కృషి చేస్తామని ఈ సందర్భంగా వారు తెలిపారు. బిన్ రెడ్డి, ధర్మబిక్షం, మల్లు స్వరాజ్యం, ఉప్పల మల్సూర్, నర్రా రాఘవరెడ్డి వంటి మహనీయుల జీవితాలను ప్రతి ఒక్కరూ ఆదర్శంగా తీసుకోవాలని పిలుపునిచ్చారు. ఈ కార్యక్రమంలో మిత్రమండలి ప్రధాన కార్యదర్శి బయ్య మల్లికార్జున్, డేగల జనార్ధన్, నాతి సవేందర్, జిలకర చంద్రమౌళి, విద్యాసాగర్, సారగండ్ల మాణిక్యమ్మ, చిత్రం భద్రమ్మ, వీర్లపాటి వెంకన్న, షేక్ సైదులు తదితరులు పాల్గొన్నారు.