సూర్యాపేట జిల్లా స్థానికం ప్రతినిధి బిక్షం

77వ గణతంత్ర దినోత్సవాన్ని పురస్కరించుకుని సూర్యాపేట మున్సిపాలిటీ పరిధిలోని 12వ వార్డు పిల్లలమర్రి ఎస్సీ కాలనీలో అంబేద్కర్ యువజన సంఘం ఆధ్వర్యంలో గణతంత్ర దినోత్సవ వేడుకలను ఘనంగా నిర్వహించారు. ఉదయం నుంచే కాలనీలో పండుగ వాతావరణం నెలకొనగా, జాతీయ భావాలతో ప్రజలు ఉత్సాహంగా పాల్గొన్నారు.ఈ కార్యక్రమంలో టీఆర్పీ యువ నాయకుడు వల్లాల బుచ్చయ్య యాదవ్ జాతీయ పతాకాన్ని ఆవిష్కరించి వార్డు ప్రజలందరికీ గణతంత్ర దినోత్సవ శుభాకాంక్షలు తెలియజేశారు. అనంతరం దేశ స్వాతంత్ర్య సాధన కోసం ప్రాణాలు అర్పించిన అమరవీరులను స్మరించుకుని ఘన నివాళులు అర్పించారు.వక్తలు తమ ప్రసంగాలలో భారత రాజ్యాంగం సామాజిక న్యాయం, సమానత్వం, స్వేచ్ఛలకు బలమైన పునాది అని పేర్కొన్నారు. డాక్టర్ బీఆర్ అంబేద్కర్ రూపకల్పన చేసిన రాజ్యాంగం వల్లనే బలహీన వర్గాలకు హక్కులు లభించాయని తెలిపారు. రాజ్యాంగ ఆత్మను ప్రతి ఒక్కరూ గౌరవించి ఆచరించాల్సిన బాధ్యత ఉందని అన్నారు.యువత దేశ నిర్మాణంలో చురుకుగా పాల్గొనాలని, విద్య, క్రమశిక్షణ, సమాజ సేవ ద్వారా ముందుకు సాగాలని పిలుపునిచ్చారు. అంబేద్కర్ ఆశయాలను ఆచరణలో పెట్టడమే నిజమైన నివాళి అని పేర్కొన్నారు.

వేడుకల్లో భాగంగా దేశభక్తి నినాదాలు, అంబేద్కర్ జయంతి స్మరణ మాటలు కాలనీ అంతటా మార్మోగాయి. పిల్లలు, యువకులు జాతీయ పతాకాలతో ఉత్సాహంగా పాల్గొన్నారు.ఈ కార్యక్రమంలో ప్రజా ప్రతినిధులు, గ్రామ పెద్దలు, యువకులు, మహిళలు, కాలనీ వాసులు పెద్ద సంఖ్యలో పాల్గొని గణతంత్ర దినోత్సవాన్ని ఘనంగా జరుపుకున్నారు. అంబేద్కర్ యువజన సంఘం ఆధ్వర్యంలో నిర్వహించిన ఈ వేడుకలు సామాజిక చైతన్యానికి నిదర్శనంగా నిలిచాయి.