పారిశుధ్య కార్మికులకు హెల్త్ చెకప్, ఘన సన్మానం

నమూనా గ్రామంగా తీర్చిదిద్దడమే లక్ష్యం

చిట్యాల మండలం పెద్దకాపర్తి గ్రామంలో తెలంగాణ ప్రభుత్వం ప్రతిష్టాత్మకంగా చేపట్టిన ‘ప్రజా పాలన–ప్రగతి ప్రణాళిక’ 99 రోజుల యాక్షన్ ప్లాన్‌కు ఆదివారం ఊపునిచ్చారు. గ్రామ సర్పంచ్ కాటం వెంకటేశం ఆధ్వర్యంలో నిర్వహించిన ప్రత్యేకకార్యక్రమంలో గ్రామ పరిశుభ్రత, కార్మికుల సంక్షేమంపై ప్రధానంగా దృష్టి సారించారు.ఈ సందర్భంగా పారిశుధ్య కార్మికుల ఆరోగ్య పరిరక్షణకు ప్రాధాన్యం ఇస్తూ వారికి హెల్త్ చెకప్ నిర్వహించారు. గ్రామ అభివృద్ధికి వెన్నెముకలుగా నిలిచే కార్మికులను సన్మానించి, సబ్బులు, కొబ్బరి నూనె, షాంపూ వంటి నిత్యావసర వస్తువులను పంపిణీ చేశారు.కార్యక్రమంలో మాట్లాడిన సర్పంచ్ కాటం వెంకటేశం గ్రామం శుభ్రంగా, ఆరోగ్యంగా ఉండటంలో పారిశుధ్య కార్మికుల సేవలు అమూల్యమని కొనియాడారు. గ్రామాన్ని ఆదర్శ పంచాయతీగా తీర్చిదిద్దే లక్ష్యంతో 99 రోజుల ప్రణాళికలో భాగంగా అభివృద్ధి పనులను వేగవంతం చేస్తున్నామని తెలిపారు. పరిశుభ్రత కేవలం కార్మికుల బాధ్యత మాత్రమే కాకుండా ప్రతి గ్రామస్థుడి బాధ్యత అని, “మన ఊరు – మన పరిశుభ్రత” భావనతో అందరూ ముందుకు రావాలని పిలుపునిచ్చారు.

ఈ కార్యక్రమంలో ఉపసర్పంచ్ ఓర్సు సైదులు, వార్డు సభ్యులు అర్పుల యాదయ్య, నీలకంఠం విజయ, కాంగ్రెస్ పార్టీ గ్రామ శాఖ అధ్యక్షుడు నీలకంఠం లింగస్వామి, మర్రి గోపాల్ రెడ్డి, సాగర్ల నాగరాజు, అనగంటి నరేష్, ఆశా వర్కర్లు, గ్రామ పంచాయతీ సిబ్బంది పాల్గొన్నారు.