సూర్యాపేట జిల్లా స్థానికం ప్రతినిధి బిక్షం

జిల్లా కేంద్రంలోని పరేడ్ గ్రౌండ్స్‌లో గణతంత్ర దినోత్సవ వేడుకలు అట్టహాసంగా నిర్వహించారు. జాతీయ పతాకావిష్కరణతో ప్రారంభమైన ఈ కార్యక్రమం దేశభక్తి భావాలతో నిండిపోయింది. ప్రజాప్రతినిధులు, అధికారులు, వివిధ రాజకీయ పార్టీల నాయకులు, విద్యార్థులు, మహిళలు, స్థానిక ప్రజలు వేల సంఖ్యలో పాల్గొని వేడుకలను విజయవంతం చేశారు.ఈ కార్యక్రమంలో ఏఐసీసీ సభ్యుడు రాంరెడ్డి సర్వోత్తమ్ రెడ్డి, వ్యవసాయ మార్కెట్ కమిటీ చైర్మన్ కొప్పుల వేణారెడ్డి, డీసీసీ అధ్యక్షుడు గుడిపాటి నర్సయ్య, పిసిసి ప్రధాన కార్యదర్శి చకిలం రాజేశ్వరరావు పాల్గొని జాతీయ పతాకానికి వందనం చేశారు. దేశ స్వాతంత్ర్యం కోసం ప్రాణత్యాగం చేసిన అమర వీరులను స్మరించుకుని ఘన నివాళులు అర్పించారు.

వక్తలు తమ సందేశంలో భారత రాజ్యాంగం ప్రపంచంలోనే అత్యుత్తమ ప్రజాస్వామ్య వ్యవస్థకు పునాది అని పేర్కొన్నారు. సమానత్వం, న్యాయం, సౌభ్రాతృత్వం అనే విలువలపై దేశం నిలబడిందని అన్నారు. రాజ్యాంగ ఆత్మను కాపాడుకోవడం ప్రతి పౌరుడి ధర్మమని స్పష్టం చేశారు.

దేశ ప్రగతిలో రైతులు, కార్మికులు, పేదలు కీలక పాత్ర పోషిస్తున్నారని, వారి సంక్షేమమే నిజమైన అభివృద్ధి అని తెలిపారు. యువత విద్యతో పాటు దేశభక్తి, సామాజిక బాధ్యతతో ముందుకు సాగాలని పిలుపునిచ్చారు. ప్రజాస్వామ్య వ్యవస్థ బలోపేతానికి ప్రతి ఒక్కరూ చురుకుగా పాల్గొనాలని సూచించారు.వేడుకలలో భాగంగా విద్యార్థులు దేశభక్తి గీతాలు ఆలపించి అలరించారు. సాంస్కృతిక కార్యక్రమాలు పరేడ్ గ్రౌండ్స్‌ను ఉత్సాహంతో నింపాయి. జాతీయ పతాకాల అలంకరణలతో మైదానం సర్వాంగసుందరంగా మారింది.ఈ కార్యక్రమంలో జిల్లా స్థాయి అధికారులు, కాంగ్రెస్ పార్టీ నాయకులు, కార్యకర్తలు, వివిధ సంఘాల ప్రతినిధులు, విద్యార్థులు, స్థానిక ప్రజలు పెద్ద సంఖ్యలో పాల్గొని గణతంత్ర దినోత్సవాన్ని ఘనంగా జరుపుకున్నారు