కూసుమంచి / ఖమ్మం:

పర్యావరణ పరిరక్షణే ప్రధాన లక్ష్యంగా సంరక్షణ క్షమత మహోత్సవం ‘సాక్షం’ కార్యక్రమాన్ని ఖమ్మంలో శనివారం నిర్వహించారు. పెట్రోలియం, సహజ వాయువు మంత్రిత్వ శాఖ పరిధిలోని పెట్రోలియం పరిరక్షణ పరిశోధన సంఘం ఆధ్వర్యంలో నెలరోజుల పాటు దేశవ్యాప్తంగా నిర్వహించే ఈ కార్యక్రమంలో భాగంగా అవగాహన ర్యాలీ చేపట్టారు.గ్రీన్ శక్తి వినియోగం, ఇంధన సామర్థ్యం పెంపు, స్థిరమైన అభివృద్ధి లక్ష్యంగా ఈ కార్యక్రమాన్ని నిర్వహిస్తున్నట్లు ఇండేన్ వాయు సంస్థ ప్రతినిధులు తెలిపారు. పర్యావరణ ప్రభావాన్ని తగ్గించేందుకు పెట్రోలియం ఉత్పత్తులను సంరక్షించడం అవసరమని ప్రజలకు వివరించారు. పరిశుభ్రమైన ఇంధనాల వినియోగం, ఇంధన సామర్థ్యం పెంపు, కార్బన్ పాదముద్రలను తగ్గించే చర్యలపై అవగాహన కల్పించారు.ఈ సందర్భంగా ఖమ్మంలోని మధురా నగర్ రోడ్డు నంబరు 12 నుండి లకారం చెరువు బండ వరకు ఇండేన్ వాయు డీలర్లు, సిబ్బంది ర్యాలీ నిర్వహించారు. ప్రజలకు ఇంధన సంరక్షణపై సూచనలు తెలియజేశారు.కార్యక్రమంలో ఇండేన్ సికింద్రాబాద్ విభాగ ప్రధాన నిర్వాహకులు సతీష్ కిషన్, అమ్మకపు నిర్వాహకులు గయని ప్రవీణ్, కూసుమంచి ఏజెన్సీ నిర్వాహకులు పెనుమూరి శ్రీనివాసరావు, పలువురు పంపిణీదారులు, సిబ్బంది పాల్గొన్నారు. పర్యావరణ పరిరక్షణలో ప్రతి ఒక్కరూ భాగస్వాములు కావాలని వారు పిలుపునిచ్చారు