భూగర్భ జలాల పరిరక్షణే ధ్యేయం.. ఇంటింటికీ వెళ్లి అవగాహన కల్పిస్తున్న సర్పంచ్

గ్రామాభివృద్ధికి వినూత్న ఆలోచనలు, ప్రజల భాగస్వామ్యంతో నరసింహపురం గ్రామాన్ని ఆదర్శంగా తీర్చిదిద్దేందుకు సర్పంచ్ వేమూరి సత్యనారాయణ ప్రత్యేక చొరవ చూపుతున్నారు. మునగాల మండల పరిధిలోని నరసింహపురం గ్రామంలో భూగర్భ జలాల పరిరక్షణ, పారిశుధ్య మెరుగుదలే లక్ష్యంగా ప్రతి ఇంటిలో ఇంకుడు గుంత నిర్మాణాన్ని ప్రోత్సహించే కార్యక్రమానికి ఆయన శ్రీకారం చుట్టారు.స్వతంత్ర అభ్యర్థిగా పోటీ చేసి అఖండ మెజార్టీతో విజయం సాధించిన సత్యనారాయణ, తనపై నమ్మకంతో గెలిపించిన గ్రామ ప్రజలకు మెరుగైన సేవలు అందించడమే ప్రధాన లక్ష్యంగా ముందుకు సాగుతున్నారు. ఇందులో భాగంగా స్వయంగా ఇంటింటికీ వెళ్లి గృహిణులకు బొట్టు పెట్టి, ఇంకుడు గుంతల నిర్మాణం వల్ల కలిగే ప్రయోజనాలను వివరిస్తూ ప్రజల్లో అవగాహన కల్పిస్తున్నారు. అంతేకాకుండా, ప్రతి ఇంటి వద్ద అనువైన స్థలాన్ని గుర్తించి ముగ్గు వేసి ఇంకుడు గుంత నిర్మాణానికి ప్రోత్సహిస్తున్నారు.