యాదాద్రి భువనగిరి, అక్టోబర్ 12: ప్రైవేటు విద్యాసంస్థల యాజమాన్యాలు, ఉపాధ్యాయుల రక్షణకు ప్రత్యేక చట్టాన్ని అమలు చేయాలని బడ్జెట్ స్కూల్స్ మేనేజ్‌మెంట్ అసోసియేషన్ ఆఫ్ తెలంగాణ (బీస్మాట్) రాష్ట్ర వర్కింగ్ ప్రెసిడెంట్ పగిడాల జలంధర్ రెడ్డి ప్రభుత్వాన్ని డిమాండ్ చేశారు.

ఈ సందర్భంగా ఆయన మాట్లాడుతూ.. విద్యార్థుల భవిష్యత్తును తీర్చిదిద్దుతూ సమాజ నిర్మాణంలో కీలక పాత్ర పోషిస్తున్న ప్రైవేటు ఉపాధ్యాయులకు తగిన గౌరవం, ఉద్యోగ భద్రత కల్పించాలని కోరారు. యాజమాన్యాలు, ఉపాధ్యాయులపై జరుగుతున్న దాడులు, వేధింపులను అరికట్టేందుకు ప్రభుత్వం కఠిన చర్యలు తీసుకోవాలన్నారు.

విద్యాబోధన చేసే ఉపాధ్యాయులే అభద్రతకు గురికావడం ఆందోళనకరమని పేర్కొన్నారు. దాడులకు పాల్పడే వారిపై చట్టప్రకారం చర్యలు తీసుకుని, బాధితులకు న్యాయం చేయాలని డిమాండ్ చేశారు. ప్రైవేటు విద్యాసంస్థల్లో గౌరవప్రదమైన పని వాతావరణం కల్పించడంతో పాటు యాజమాన్యాలు, ఉపాధ్యాయుల హక్కులను పరిరక్షించాలని ప్రభుత్వాన్ని కోరారు. వారి న్యాయమైన డిమాండ్లను పరిష్కరించి, ఉద్యోగ భద్రతకు భరోసా కల్పించాలని జలంధర్ రెడ్డి విజ్ఞప్తి చేశారు.