యాదాద్రి భువనగిరి జిల్లా చౌటుప్పల్‌లో ప్రజల సౌకర్యాలను విస్మరిస్తూ అధికారులు మరోసారి ఏకపక్షంగా నిర్ణయం తీసుకున్నారు. వలిగొండ రోడ్డు జంక్షన్‌ను ఎలాంటి ప్రత్యామ్నాయ ఏర్పాట్లు చేయకుండానే అకస్మాత్తుగా మూసివేయడంపై స్థానికంగా తీవ్ర నిరసన వ్యక్తమవుతోంది. ఈ చర్యపై ప్రముఖ స్థానిక నాయకులు చెరుకు శివకుమార్ గౌడ్ తీవ్ర ఆగ్రహం వ్యక్తం చేశారు.​గతంలో స్థానికులు చేసిన సుదీర్ఘ పోరాటాల ఫలితంగా స్పందించిన అధికారులు అప్పట్లో ఈ రహదారిని పునరుద్ధరించారు. కానీ, ఇప్పుడు మళ్లీ ఎలాంటి ముందస్తు సమాచారం లేకుండా జంక్షన్‌ను మూసివేయడంతో నిత్యం రాకపోకలు సాగించే ప్రయాణికులు, స్థానిక ప్రజలకు తీవ్ర ఇబ్బందులు తప్పడం లేదు. రోడ్డు దాటేందుకు కనీస రక్షణ చర్యలు లేదా సురక్షితమైన మార్గం చూపకుండానే దారులు మూసివేయడం అధికారుల నిర్లక్ష్యానికి నిదర్శనమని ప్రజలు మండిపడుతున్నారు.​ఈ సందర్భంగా చెరుకు శివకుమార్ గౌడ్ మాట్లాడుతూ... రోడ్డు దాటేందుకు సురక్షితమైన మార్గం వెంటనే కల్పించాలని, మూసివేసిన వలిగొండ రోడ్డు జంక్షన్‌ను తక్షణమే పునరుద్ధరించాలని డిమాండ్ చేశారు. ప్రజల సమస్య పరిష్కారమయ్యే వరకు ఈ పోరాటం ఆగదని స్పష్టం చేశారు. ఒకవేళ అధికారులు స్పందించి తగిన చర్యలు తీసుకోకపోతే, ప్రజా సమస్యలపై జాతీయ రహదారిపై పెద్దఎత్తున రాస్తారోకో నిర్వహిస్తామని తీవ్రంగా హెచ్చరించారు.