హైదరాబాద్‌, అక్టోబర్‌ 11 విద్యారంగంలో విశేష సేవలందిస్తున్న విద్యావేత్త దుగ్యాల రాముకు జీవితకాల సాఫల్య పురస్కారం లభించింది. శారదా ఎడ్యుకేషనల్‌ సొసైటీ ఆధ్వర్యంలో ఆదివారం లక్డీకాపూల్‌లోని భగవాన్‌ మహావీర్‌ ఆడిటోరియంలో నిర్వహించిన అంతర్జాతీయ ఉపాధ్యాయ దినోత్సవ వేడుకల్లో ఈ అవార్డును ప్రదానం చేశారు.

తెలంగాణ ఉన్నత విద్యా మండలి వైస్‌ చైర్మన్‌-1 ప్రొఫెసర్‌ ఎటికాల పురుషోత్తం ముఖ్య అతిథిగా హాజరై దుగ్యాల రామును శాలువాతో సత్కరించి పురస్కారాన్ని అందజేశారు. ఈ సందర్భంగా ఆయన మాట్లాడుతూ.. విద్యావేత్తల సేవలు సమాజ నిర్మాణంలో కీలకమని, నిస్వార్థంగా విద్యాసేవ అందిస్తూ విద్యార్థుల భవిష్యత్తుకు బాటలు వేస్తున్న దుగ్యాల రాముకు ఈ పురస్కారం తగిన గుర్తింపు అని పేర్కొన్నారు. ఆయన సేవలు భావితరాలకు స్ఫూర్తినిస్తాయని తెలిపారు.

పురస్కార గ్రహీత దుగ్యాల రాము మాట్లాడుతూ.. తన సేవలను గుర్తించి అవార్డుకు ఎంపిక చేసిన శారదా ఎడ్యుకేషనల్‌ సొసైటీకి కృతజ్ఞతలు తెలిపారు. ఈ గౌరవం తనపై మరింత బాధ్యతను పెంచిందని, విద్యారంగ అభివృద్ధికి మరింత కృషి చేస్తానని చెప్పారు. కార్యక్రమంలో సొసైటీ ప్రతినిధులు, విద్యావేత్తలు, పలువురు మేధావులు పాల్గొని దుగ్యాల రాముకు అభినందనలు తెలిపారు.