మరానున్న రబీ సీజన్‌లో పంటల ఎంపిక, పంటల వైవిధ్యీకరణ, శాస్త్రీయ సాగు పద్ధతులపై రైతులకు దిశానిర్దేశం చేసేందుకు ప్రభుత్వం నిర్వహిస్తున్న ‘రైతు నేస్తం’ కార్యక్రమం నేడు మునగాల మండలంలో ప్రత్యక్ష ప్రసారం కానుంది. ఉదయం 10 గంటల నుంచి మునగాల, రేపాల, ఆకుపాముల రైతు వేదికల్లో ఈ కార్యక్రమాన్ని వీక్షించేందుకు ఏర్పాట్లు చేశారు.ఎల్నినో పరిస్థితుల నేపథ్యంలో రబీ సాగులో రైతులు అప్రమత్తంగా వ్యవహరించాల్సిన అవసరాన్ని దృష్టిలో ఉంచుకుని పంటల ఎంపిక, ప్రత్యామ్నాయ పంటల సాగు, ఆధునిక వ్యవసాయ పద్ధతులపై ముఖ్యమంత్రి రైతులకు అవగాహన కల్పించనున్నారు. వాతావరణ పరిస్థితులకు అనుగుణంగా పంటలను ఎంచుకోవడం, సాగులో శాస్త్రీయ విధానాలను పాటించడంపై సూచనలు అందించనున్నారు. ప్రజాప్రతినిధులు, వ్యవసాయ అధికారులు, రైతు సంఘాల ప్రతినిధులు, రైతులు ఉదయం 10 గంటలకే సంబంధిత రైతు వేదికలకు చేరుకుని కార్యక్రమంలో పాల్గొనాలని మునగాల మండల వ్యవసాయ అధికారి రాజు ఆదివారం ఒక ప్రకటనలో కోరారు.