చంపాపేట: మహిళలు నైపుణ్యాలను పెంపొందించుకుని ఆర్థికంగా స్వావలంబన సాధించాలని ఎల్బీనగర్ ఎమ్మెల్యే దేవిరెడ్డి సుధీర్‌రెడ్డి అన్నారు. జయచంద్రారెడ్డి చారిటబుల్ ట్రస్ట్ ఆధ్వర్యంలో చంపాపేట మోడల్ మార్కెట్ బిల్డింగ్‌లో నిర్వహించిన ఉచిత కుట్టు శిక్షణ పూర్తి చేసుకున్న మహిళలకు సర్టిఫికెట్లు పంపిణీ చేశారు. ట్రస్ట్ చైర్మన్ కమల సుధీర్‌రెడ్డితో కలిసి ఎమ్మెల్యే సర్టిఫికెట్లను అందజేశారు. ఈ కార్యక్రమానికి చంపాపేట డివిజన్ యువ నాయకురాలు సంధ్య రవి ముదిరాజ్ అధ్యక్షత వహించారు.

ఈ సందర్భంగా ఎమ్మెల్యే మాట్లాడుతూ.. మహిళలకు నైపుణ్య శిక్షణ అందించడం ద్వారా వారు సొంతంగా ఉపాధి అవకాశాలు పొందడంతోపాటు కుటుంబ ఆర్థిక అభివృద్ధికి తోడ్పడతారని పేర్కొన్నారు. మహిళల స్వావలంబన లక్ష్యంగా ట్రస్ట్ ఆధ్వర్యంలో ఉచిత శిక్షణ కార్యక్రమాలు నిర్వహిస్తున్నట్లు తెలిపారు. కుట్టు శిక్షణతోపాటు బ్యూటీషియన్, మెహందీ వంటి కోర్సుల్లోనూ శిక్షణ అందిస్తున్నట్లు వెల్లడించారు. శిక్షణ పొందిన మహిళలు ఈ అవకాశాలను సద్వినియోగం చేసుకుని స్వయం ఉపాధిలో రాణించాలని సూచించారు.

కార్యక్రమంలో రమాదేవి, ఉష, ప్యారి, కవిత, లావణ్య, స్వయం ప్రభు, ట్రస్ట్ ప్రతినిధులు, బీఆర్ఎస్ నాయకులు, కార్యకర్తలు, శిక్షణ పొందిన మహిళలు పాల్గొన్నారు.