మునగాల మండలం నరసింహులగూడెం జిల్లా పరిషత్ ఉన్నత పాఠశాల మైదానంలో ఆదివారం నరసింహులగూడెం ప్రీమియర్ లీగ్ (ఎన్‌పీఎల్) సీజన్-3 క్రికెట్ పోటీలు ఘనంగా ప్రారంభమయ్యాయి. ఈ పోటీలను గ్రామ సర్పంచ్ ఇందిరా నరసయ్య ప్రారంభించారు.ఈ సందర్భంగా ఆమె మాట్లాడుతూ.. యువత క్రీడల్లో చురుకుగా పాల్గొని తమ ప్రతిభను చాటుకోవాలని పిలుపునిచ్చారు. క్రీడలు కేవలం వినోదం కోసం మాత్రమే కాకుండా శారీరక దృఢత్వం, మానసిక ఉల్లాసం, క్రమశిక్షణ, ఐక్యతను పెంపొందించేందుకు దోహదపడతాయని అన్నారు. గ్రామీణ ప్రాంతాల్లో ఎంతో ప్రతిభ కలిగిన క్రీడాకారులు ఉన్నారని, వారికి సరైన అవకాశాలు కల్పిస్తే ఉన్నత స్థాయికి ఎదగగలరని పేర్కొన్నారు. యువత చెడు వ్యసనాలకు దూరంగా ఉంటూ క్రీడలపై దృష్టి సారించాలని సూచించారు. క్రీడాకారులు గెలుపోటములను సమానంగా స్వీకరిస్తూ స్నేహభావంతో పోటీల్లో పాల్గొనాలని కోరారు. గ్రామంలో క్రీడాభివృద్ధికి ప్రతి ఒక్కరూ సహకరించాలని ఆమె పిలుపునిచ్చారు.

ఈ కార్యక్రమంలో జూలకంటి కొండారెడ్డి, మార వెంకట్ రెడ్డి, గణేష్, క్రికెట్ సీనియర్ క్రీడాకారుడు రామారావు, క్రీడాకారులు శివ, సురేష్, వీరబాబు, వెంకటేష్, ఎస్కే జానీ, నవీన్ తదితరులు పాల్గొన్నారు.