హైదరాబాద్‌: పట్టభద్రుల ఎమ్మెల్సీ ఎన్నికల్లో విజయం సాధించడమే లక్ష్యంగా కాంగ్రెస్‌ పార్టీ కసరత్తు ముమ్మరం చేస్తోంది. ఇందులో భాగంగా మహబూబ్‌నగర్‌–రంగారెడ్డి–హైదరాబాద్‌ పట్టభద్రుల నియోజకవర్గ కాంగ్రెస్‌ అభ్యర్థి సామ రామ్మోహన్‌రెడ్డి బంజారాహిల్స్‌లో మాజీ ఎంపీ, ఆల్‌ ఇండియా ప్రొఫెషనల్స్‌ కాంగ్రెస్‌ జాతీయ చైర్మన్‌ మధుయాష్కీ గౌడ్‌ను మర్యాదపూర్వకంగా కలిశారు. ఈ సందర్భంగా మధుయాష్కీ ఆయనకు స్వీట్లు తినిపించి, శాలువాతో సత్కరించి శుభాకాంక్షలు తెలిపారు.

అనంతరం రోడ్‌ డెవలప్‌మెంట్‌ కార్పొరేషన్‌ మాజీ చైర్మన్‌ మల్‌రెడ్డి రాంరెడ్డితో కలిసి నేతలు ఎన్నికల కార్యాచరణపై చర్చించారు. అర్హులైన పట్టభద్రులందరూ ఓటర్లుగా నమోదు చేసుకునేలా నియోజకవర్గవ్యాప్తంగా విస్తృత ప్రచారం నిర్వహించాలని నిర్ణయించారు. ఓటరు నమోదు ప్రక్రియను క్షేత్రస్థాయిలో మరింత ముమ్మరం చేయడంపై సమాలోచనలు జరిపారు. ఈ కార్యక్రమంలో కాంగ్రెస్‌ నాయకులు, కార్యకర్తలు పాల్గొన్నారు.