మల్కాపురం గ్రామ పరిధిలోని ఆందోల్ మైసమ్మ ఆలయం సమీపంలో నిరాశ్రయుడైన ఓ వృద్ధుడు అనుమానాస్పద స్థితిలో (అనారోగ్యంతో) మృతి చెందాడు. తమిళనాడుకు చెందిన ఈ వ్యక్తి కొద్ది సంవత్సరాలుగా అక్కడే తలదాచుకుంటూ జీవనం సాగిస్తున్నాడు.​స్థానికులు తెలిపిన వివరాల ప్రకారం.. తమిళనాడు రాష్ట్రానికి చెందిన బాబా (సుమారు 60 సంవత్సరాలు) గత ఐదు సంవత్సరాలుగా తనకు ఎవరూ లేరంటూ చౌటుప్పల్ మండలం, మల్కాపురం పరిధిలోని ఆందోల్ మైసమ్మ ఆలయ ప్రాంతానికి చేరుకున్నాడు. ఆలయ ప్రాంగణంలోని దుకాణాల వద్ద పాత కాగితాలు సేకరిస్తూ జీవనం వెల్లదీస్తున్నాడు.​ఇటీవల కాలంలో బాబా తీవ్ర అనారోగ్యంతో బాధపడుతున్నాడు. సరిగ్గా ఆహారం కూడా తీసుకోలేకపోతున్నట్లు స్థానికులకు తెలిపాడు.​ఆయన పరిస్థితిని గమనించిన స్థానికులు గతంలో అతనికి వైద్య చికిత్స కూడా అందించినట్లు సమాచారం.

​ఈ నేపథ్యంలోనే, ఈరోజు ఉదయం సుమారు 10:00 గంటల సమయంలో మైసమ్మ ఆలయ బస్టాండ్ వద్ద నిద్రిస్తున్న స్థితిలోనే అతను మృతి చెందినట్లు స్థానికులు గుర్తించారు.​ఈ ఘటనపై సమాచారం అందుకున్న పోలీసులు వెంటనే సంఘటనా స్థలానికి చేరుకుని పరిశీలించారు. మృతుడి వివరాలు, మృతికి గల ఖచ్చితమైన కారణాలపై పోలీసులు విచారణ చేపడుతున్నారు.