సమయస్ఫూర్తితో కుటుంబ సభ్యులను కాపాడిన మిర్యాలగూడ వన్‌టౌన్ పోలీసులు.

మిర్యాలగూడ: అగ్నిప్రమాదంలో చిక్కుకున్న ఐదుగురు కుటుంబ సభ్యులను మిర్యాలగూడ వన్‌టౌన్ పోలీసులు సురక్షితంగా కాపాడారు. సకాలంలో స్పందించి సహాయక చర్యలు చేపట్టి వారి ప్రాణాలను రక్షించారు.

నల్లగొండ జిల్లా మిర్యాలగూడ పట్టణంలోని ఇస్లాంపుర ప్రాంతంలో చెప్పుల దుకాణం ఉన్న భవనంలో మంటలు చెలరేగాయి. దీంతో పై అంతస్తుల్లో నివాసం ఉంటున్న కుటుంబ సభ్యులు దట్టమైన పొగ, మంటల మధ్య చిక్కుకుపోయి బయటకు రాలేక తీవ్ర భయాందోళనకు గురయ్యారు.

సమాచారం అందుకున్న మిర్యాలగూడ వన్‌టౌన్ పోలీస్ సిబ్బంది వెంటనే ఘటనా స్థలానికి చేరుకుని సహాయక చర్యలు చేపట్టారు. సమయస్ఫూర్తితో వ్యవహరించి భవనంలో చిక్కుకున్న ఐదుగురు కుటుంబ సభ్యులను సురక్షితంగా బయటకు తీసుకొచ్చారు.

ప్రమాద సమయంలో వేగంగా స్పందించి ఐదుగురి ప్రాణాలను కాపాడిన పోలీసుల సేవలు అభినందనీయంగా నిలిచాయి. అత్యవసర పరిస్థితుల్లో ప్రజల రక్షణకు పోలీసులు చూపిన చొరవపై ప్రశంసలు వ్యక్తమవుతున్నాయి.