అబ్దుల్లాపూర్‌మెట్‌ తహశీల్దార్‌, మండల సర్వేయర్‌ అరెస్ట్‌
అబ్దుల్లాపూర్‌మెట్‌: లేఅవుట్‌ అనుమతుల కోసం జాయింట్‌ ఇన్‌స్పెక్షన్‌ సర్వే రిపోర్టు జారీ చేసేందుకు రూ.20 లక్షల లంచం తీసుకుంటూ అబ్దుల్లాపూర్‌మెట్‌ తహశీల్దార్‌ బి. సుదర్శన్‌రెడ్డి, మండల సర్వేయర్‌ బటుక శ్రీనివాసులు ఏసీబీ అధికారులకు పట్టుబడ్డారు. ఏసీబీ, సీఐయూ అధికారులు సంయుక్తంగా నిర్వహించిన దాడిలో ఈ ఘటన వెలుగులోకి వచ్చింది.
రూ.30 లక్షల నుంచి రూ.20 లక్షలకు..
లేఅవుట్‌ కోసం జాయింట్‌ ఇన్‌స్పెక్షన్‌ సర్వే రిపోర్టు ఇచ్చేందుకు తొలుత రూ.30 లక్షలు డిమాండ్‌ చేయగా, చివరకు రూ.20 లక్షలకు ఒప్పందం కుదిరినట్లు ఏసీబీ అధికారులు వెల్లడించారు. తహశీల్దార్‌ ఆదేశాల మేరకు మండల సర్వేయర్‌ లంచం సొమ్ము స్వీకరిస్తుండగా అధికారులు రెడ్‌హ్యాండెడ్‌గా పట్టుకున్నారు. నిందితుల వద్ద నుంచి రూ.20 లక్షల నగదును స్వాధీనం చేసుకున్నారు.
రసాయన పరీక్షల్లో పాజిటివ్‌
సర్వేయర్‌ రెండు చేతుల వేళ్లకు నిర్వహించిన రసాయన పరీక్షల్లో పాజిటివ్‌గా తేలింది. తహశీల్దార్‌, మండల సర్వేయర్‌ను అరెస్ట్‌ చేసి నాంపల్లిలోని ఏసీబీ కేసుల ప్రత్యేక కోర్టులో హాజరుపరిచారు. ఈ కేసులో తదుపరి దర్యాప్తు కొనసాగుతోందని ఏసీబీ అధికారులు తెలిపారు.
లంచం అడిగితే 1064కు ఫోన్‌ చేయండి
ప్రభుత్వ ఉద్యోగులు ఎవరైనా లంచం డిమాండ్‌ చేస్తే ఏసీబీ టోల్‌ఫ్రీ నంబర్‌ 1064కు ఫిర్యాదు చేయాలని అధికారులు ప్రజలకు సూచించారు.
పాఠకుల అభిప్రాయాలు
ఇప్పటివరకు ఎలాంటి కామెంట్స్ పోస్ట్ చేయలేదు.
కామెంట్‌ను పోస్ట్ చేయండి