నారాయణఖేడ్ స్థానిక ప్రతినిధి:నారాయణఖేడ్ నియోజకవర్గంలో మానూర్ మండల కేంద్రంలోని ప్రాథమిక ఆరోగ్య కేంద్రాన్ని నారాయణఖేడ్ సబ్ కలెక్టర్ ఎన్. ఉమా హారతి ఆకస్మికంగా సందర్శించి సమగ్రంగా తనిఖీ చేశారు.ఈ సందర్భంగా ఆసుపత్రిలో అందుబాటులో ఉన్న మందుల స్టాక్ రిజిస్టర్‌తో పాటు వైద్య, పారామెడికల్ సిబ్బంది హాజరు రిజిస్టర్‌లను పరిశీలించారు. మందుల నిల్వల్లో ఎలాంటి లోటుపాట్లు లేకుండా ఎప్పటికప్పుడు రికార్డులు సక్రమంగా నిర్వహించాలని అధికారులను ఆదేశించారు.వైద్య సిబ్బంది అందరూ విధి సమయానికి హాజరై బాధ్యతాయుతంగా పనిచేయాలని, సమయపాలన తప్పనిసరిగా పాటించాలని హెచ్చరించారు. రోగులకు ప్రభుత్వ వైద్య సేవలు సమర్థవంతంగా, నాణ్యంగా అందించాల్సిన బాధ్యత ప్రతి ఒక్కరిపై ఉందని స్పష్టం చేశారు.అలాగే ప్రాథమిక ఆరోగ్య కేంద్రం ఆవరణతో పాటు పరిసరాలు ఎల్లప్పుడూ శుభ్రంగా ఉంచాలని, పారిశుధ్యంపై ప్రత్యేక శ్రద్ధ వహించాలని సూచించారు. ప్రజలకు మెరుగైన ఆరోగ్య సేవలు అందేలా అధికారులు, సిబ్బంది సమన్వయంతో పనిచేయాలని సబ్ కలెక్టర్ తెలిపారు.