కక్కిరేణి స్థానికం ప్రతినిధి :

ఎన్నికలు అంటే కోట్ల రూపాయల ఖర్చుతో కూడుకున్న పని అని భావించే ఈ రోజుల్లో, యాదాద్రి భువనగిరి జిల్లా కక్కిరేణి గ్రామానికి చెందిన వేముల వసంత సైదులు గారు ఒక అద్భుతమైన ఉదాహరణగా నిలిచారు. స్వతంత్ర అభ్యర్థిగా సర్పంచ్ బరిలో నిలిచిన ఆమె, కేవలం ₹14,000 ఖర్చుతోనే ప్రచారం నిర్వహించి అందరినీ ఆశ్చర్యపరిచారు. ఎటువంటి డబ్బు, మద్యం పంపిణీ చేయకుండా, కేవలం సేవా దృక్పథంతో ఇంటింటికీ వెళ్లి కరపత్రాలు పంచుతూ ప్రచారం చేశారు.

మొత్తం 2,060 మంది ఓటర్లు ఉన్న ఈ గ్రామంలో, ఆదివారం జరిగిన ఎన్నికల్లో 1,842 మంది తమ ఓటు హక్కును వినియోగించుకోగా, 89.42 శాతం పోలింగ్ నమోదైంది. ఈ హోరాహోరీ పోరులో వేముల వసంత సైదులు గారు 517 ఓట్లు సాధించి రెండో స్థానంలో నిలిచి నైతిక విజయాన్ని అందుకున్నారు. సామాన్య ప్రజల నమ్మకాన్ని గెలవడానికి కోట్లు అవసరం లేదని, కేవలం నిజాయితీ ఉంటే చాలని ఆమె నిరూపించారు!