నారాయణఖేడ్ స్థానిక ప్రతినిధి కృష్ణ:సంక్రాంతి భారతదేశ సంస్కృతి, సంప్రదాయాలకు ప్రతీకగా నిలిచే అతి ముఖ్యమైన పండుగ. ఉగాది, దసరా, దీపావళి వంటి పండుగల మధ్య సంక్రాంతికి ప్రత్యేక గుర్తింపు ఉంది. ముఖ్యంగా ఇది రైతుల జీవితంతో ముడిపడి ఉన్న పండుగ కావడంతో “పెద్ద పండుగ”గా పిలుస్తారు. నెలల తరబడి శ్రమించిన రైతులకు పంట చేతికి వచ్చే కాలం కావడంతో ఆనందం, సంతృప్తి వెల్లివిరుస్తాయి. ప్రకృతికి, సూర్యుడికి, భూమికి కృతజ్ఞతలు తెలుపుకునే పండుగగా కూడా సంక్రాంతి భావిస్తారు. గ్రామీణ జీవనశైలి, కుటుంబ బంధాలు, సంప్రదాయాలు అన్నీ ఈ పండుగలో ప్రతిబింబిస్తాయి.

సంక్రాంతి సౌరమానాన్ని అనుసరించి జరుపుకునే పండుగ. సూర్యుడు మకర రాశిలో ప్రవేశించే రోజును మకర సంక్రమణం అంటారు. ఆ రోజునే సంక్రాంతి పండుగగా జరుపుకుంటారు.ఈ రోజు నుంచే ఉత్తరాయణ పుణ్యకాలం ప్రారంభమవుతుందని శాస్త్రాలు చెబుతాయి. సూర్యుడి గమనంతో మన జీవన విధానం ముడిపడి ఉందని ఈ పండుగ గుర్తు చేస్తుంది. ఖగోళ శాస్త్రంతో మతాచారాలు కలిసిన అరుదైన పండుగగా సంక్రాంతి నిలుస్తుంది. ఈ మార్పు మన జీవితాల్లో కూడా సానుకూలత తీసుకురావాలని ప్రజలు విశ్వసిస్తారు.సంక్రాంతికి ముందు వచ్చే ధనుర్మాసానికి ప్రత్యేక ప్రాధాన్యత ఉంది. ఈ మాసంలో మహిళలు వేకువజామునే లేచి ఇళ్ల ముందర కళ్ళాపి చల్లి శుభ్రం చేస్తారు. ఆవు పేడతో గొబ్బిళ్లు తయారు చేసి, బంతిపూలు వంటి పువ్వులతో అలంకరిస్తారు. రంగురంగుల ముగ్గులు ఇంటి ముందర వేయడం ద్వారా శుభం, ఐశ్వర్యం రావాలని కోరుకుంటారు. ఈ సంప్రదాయాలు ప్రకృతితో మన అనుబంధాన్ని చాటుతాయి. గ్రామాల్లో ఈ రోజుల్లో ఒక ప్రత్యేకమైన ప్రశాంతత, పవిత్రత కనిపిస్తుంది.

సంక్రాంతి మూడు రోజుల పండుగగా జరుపుకుంటారు.మొదటి రోజు భోగి. ఈ రోజున వేకువనే లేచి భోగిమంటలు వేస్తారు. పనికిరాని పాత వస్తువులను మంటల్లో వేసి పాతదాన్ని వదిలి కొత్త జీవితానికి సిద్ధమవుతారు.భోగి రోజు తలస్నానాలు చేసి దేవుడికి పులగం నైవేద్యంగా పెడతారు. సాయంత్రం చిన్న పిల్లలకు భోగిపళ్ళు పోస్తారు. పెద్దల ఆశీర్వాదాలతో పిల్లలు ఆరోగ్యంగా, దీర్ఘాయుష్కులుగా ఉండాలని ఆకాంక్షిస్తారు.రెండవ రోజు మకర సంక్రాంతి అసలు పండుగ రోజు. ఈ రోజు తల్లిదండ్రులకు, పెద్దలకు తర్పణాలు విడిచి వారి ఋణం తీర్చుకుంటారు.ఇంట్లో పరమాన్నం,గారెలు,బొబ్బట్లు,అరిసెలు వంటి రకరకాల పిండివంటలు తయారు చేస్తారు. కొత్త పంటతో చేసిన వంటకాలను దేవుడికి నైవేద్యంగా పెట్టి కుటుంబ సభ్యులతో కలిసి భుజిస్తారు.కొత్త బట్టలు ధరించడం, బంధుమిత్రులను కలవడం ఈ రోజు ప్రత్యేకత.పిల్లలు గాలిపటాలు ఎగురవేస్తూ ఆనందంగా కాలక్షేపం చేస్తారు.మూడవ రోజు కనుమ పండుగ. ఈ రోజు పశువులకు ప్రత్యేక గౌరవం ఇస్తారు. వ్యవసాయానికి సహకరించే ఎద్దులు, ఆవులను అలంకరించి పూజలు చేస్తారు. గ్రామాల్లో గంగిరెద్దులు, హరిదాసులు, జంగమదేవరలతో సందడి కనిపిస్తుంది. జానపద కళలు, ఆటపాటలు ఈ రోజుల్లో ప్రత్యేక ఆకర్షణగా నిలుస్తాయి. మొత్తం జనవరి నెల అంతా పండుగ వాతావరణం కొనసాగుతుంది. కుటుంబ ఐక్యతను పెంపొందించే, సంస్కృతిని తరతరాలకు అందించే పండుగగా సంక్రాంతి తెలుగు ప్రజల హృదయాల్లో చిరస్థాయిగా నిలిచింది. ఇందులో భాగంగా హరిదాస్ వేషధారణలో ఆరో తరగతి విద్యార్థి శశాంక్ అందరినీ ఆకర్షించాడు ఈ కార్యక్రమంలో రెస్పాండెంట్ కమ్మరి వెంకటరత్నం ప్రిన్సిపాల్ కమ్మరి ప్రకాష్ మరియు ఉపాధ్యాయ బృందం విద్యార్థిని విద్యార్థులు ఆనందోత్సాహాలతో సంక్రాంతి సంబరాలను ఘనంగా నిర్వహించడం జరిగింది