ఏలూరు జిల్లా ప్రతినిధి గడ్డం జగన్మోహన్ రెడ్డి నూజివీడు సంక్రాంతి పండుగ సందర్భంగా ఇతర రాష్ట్రాలు, కేంద్రపాలిత ప్రాంతాలు మరియు విదేశాల నుంచి నూజివీడు స్టేషన్ పరిధిలోని నూజివీడు, ఆగిరిపల్లి, ముసునూరు మరియు చాట్రాయి మండలాలకు పెద్ద ఎత్తున ప్రజల రాకపోకలు జరుగుతున్న నేపథ్యంలో, మద్యం అక్రమ రవాణాను అరికట్టేందుకు ప్రత్యేక బృందాలతో రహదారులపై వాహనాల తనిఖీలు చేపట్టినట్లు నూజివీడు ప్రొహిబిషన్ మరియు ఎక్సైజ్ ఇన్స్పెక్టర్ శ్రీ ఏ. మస్తానయ్య తెలిపారు.ఇతర రాష్ట్రాలు, కేంద్రపాలిత ప్రాంతాలు లేదా విదేశాల నుంచి అక్కడి మద్యం ఆంధ్రప్రదేశ్ రాష్ట్రంలోకి తీసుకురావడం, కలిగి ఉండటం లేదా రవాణా చేయడం ఎక్సైజ్ చట్టం ప్రకారం నేరమని ఆయన స్పష్టం చేశారు. ఆంధ్రప్రదేశ్లో ప్రభుత్వ అనుమతితో నాణ్యమైన మద్యం అందుబాటులో ఉండగా, బయట రాష్ట్రాల మద్యం కొనుగోలు చేయాల్సిన అవసరం లేదని ప్రజలకు సూచించారు. బయట రాష్ట్రాల మద్యంతో ఎవరైనా పట్టుబడితే, సంబంధిత వ్యక్తులను అరెస్టు చేసి కేసులు నమోదు చేయడమే కాకుండా, మద్యం రవాణాకు ఉపయోగించిన వాహనాలను కూడా స్వాధీనం చేసుకొని చట్టపరమైన చర్యలు తీసుకుంటామని తెలిపారు. ఈ నేపథ్యంలో నూజివీడు స్టేషన్ పరిధిలోని నాలుగు మండలాల్లో ప్రత్యేక బృందాలతో రహదారులపై వాహనాల తనిఖీలు నిరంతరం కొనసాగుతున్నాయని తెలిపారు. అలాగే ప్రైవేటు బస్సులు, టూరిస్ట్ బస్సులు, ప్రైవేట్ టాక్సీల యజమానులు అప్రమత్తంగా ఉండాలని సూచించారు. డ్రైవర్లు, ప్రయాణికులు లేదా వారి బంధువులు ఎవరైనా ఇతర రాష్ట్రాలు, కేంద్రపాలిత ప్రాంతాలు లేదా విదేశీ మద్యం రవాణా చేస్తూ పట్టుబడితే, సంబంధిత వాహనాలపై కూడా కేసులు నమోదు చేసి స్వాధీనం చేసుకుంటామని ప్రొహిబిషన్ మరియు ఎక్సైజ్ ఇన్స్పెక్టర్ హెచ్చరించారు.