కుటుంబానికి అండగా నిలిచిన ఎస్సై వీరబాబు

నకిరేకల్ పోలీసులకు హ్యాట్సాఫ్! తప్పిపోయిన చిన్నారిని అప్రమత్తతతో కాపాడి, అతి తక్కువ సమయంలోనే తల్లిదండ్రుల చెంతకు చేర్చిన నకిరేకల్ పోలీసులు.

నకిరేకల్ స్థానీకం వార్తలు:

ప్రయాణ హడావిడిలో తల్లికి తెలియకుండా బస్సు దిగి తప్పిపోయిన ఓ చిన్నారిని, నకిరేకల్ పోలీసులు అత్యంత చాకచక్యంగా, అప్రమత్తంగా వ్యవహరించి కేవలం కొద్దిసేపట్లోనే తిరిగి కుటుంబ సభ్యులకు అప్పగించారు. ఈ ఘటన నకిరేకల్ పోలీస్ స్టేషన్ పరిధిలో చోటుచేసుకుంది.

దండుగల చైత్ర (తండ్రి రాజు) అనే చిన్నారి తన తల్లితో కలిసి సూర్యాపేట వెళ్తుండగా, మార్గమధ్యలో నకిరేకల్ సెంటర్‌లో తల్లికి తెలియకుండా ప్రమాదవశాత్తు కిందకు దిగింది. వాహనం ముందుకు వెళ్లడం, పాప ఒంటరిగా మిగిలిపోవడంతో ఆందోళనకు గురైంది.

గమనించిన స్థానికులు పాపను వెంటనే నకిరేకల్ పోలీస్ స్టేషన్‌కు తరలించారు. విషయం తెలుసుకున్న ఎస్సై వీరబాబు గారు వెంటనే స్పందించారు. పాపతో ఆప్యాయంగా మాట్లాడి వివరాలు సేకరించారు. సాంకేతికతను, సిబ్బందిని వినియోగించి పాప కుటుంబ సభ్యుల వివరాలు కనుగొన్నారు. వెంటనే వారికి సమాచారం అందించి, పోలీస్ స్టేషన్‌కు రప్పించి పాపను క్షేమంగా అప్పగించారు.

పోలీసులు చూపిన చొరవకు, అప్రమత్తతకు పాప తల్లిదండ్రులు కన్నీటి పర్యంతమై కృతజ్ఞతలు తెలిపారు. ఆపదలో ఉన్నవారికి అండగా నిలిచిన నకిరేకల్ పోలీసులను, ఎస్సై వీరబాబును స్థానికులు అభినందించారు.