బాకారం లావణ్య, రత్నపురం పద్మ పిలుపు

భువనగిరి స్థానికం ప్రతినిధి

చదువుల తల్లి, సామాజిక ఉద్యమకారిణి సావిత్రిబాయి పూలే జీవితం నేటి తరానికి ఆదర్శంగా నిలవాలని తెలంగాణ ఉద్యమకారుల సమాఖ్య రాష్ట్ర అధ్యక్షురాలు బాకారం లావణ్య, జిల్లా అధ్యక్షురాలు రత్నపురం పద్మ పిలుపునిచ్చారు.

శనివారం భువనగిరి పట్టణ శివారులోని శ్రీ సాయి ప్రశాంతి విద్యా నికేతన్ పాఠశాలలో నిర్వహించిన సావిత్రిబాయి పూలే 196వ జయంతి వేడుకల్లో వారు పాల్గొని మాట్లాడారు. ముందుగా సావిత్రిబాయి పూలే చిత్రపటానికి పూలమాలలు వేసి నివాళులర్పించారు.ఈ సందర్భంగా మాజీ మండల విద్యాధికారి బండారు రవివర్ధన్ మాట్లాడుతూ, సుమారు 180 ఏళ్ల క్రితమే బాలికల విద్య కోసం 18 మహిళా పాఠశాలలు స్థాపించిన సావిత్రిబాయి పూలే దేశ తొలి మహిళా ఉపాధ్యాయురాలని కొనియాడారు. జిల్లా ఎస్సీ–ఎస్టీ విజిలెన్స్ అండ్ మానిటరింగ్ కమిటీ సభ్యుడు బర్రె సుదర్శన్ బాల్యవివాహాల నిషేధం, వితంతు వివాహాల ప్రోత్సాహం, సతీ సహగమనానికి వ్యతిరేకంగా ఆమె చేసిన పోరాటాలను గుర్తుచేశారు.జిల్లా బాలల పరిరక్షణ కమిటీ సభ్యుడు ఎర్ర శివరాజ్ మాట్లాడుతూ సావిత్రిబాయి పూలే, జ్యోతిరావు పూలే, అంబేడ్కర్ త్యాగాల ఫలితంగానే ఉచిత నిర్బంధ విద్యాహక్కు చట్టం అమల్లోకి వచ్చిందన్నారు. సామాజిక కార్యకర్త కొడారి వెంకటేష్ పూలే దంపతులకు భారతరత్న ఇవ్వాలని డిమాండ్ చేస్తూ, వారి జీవితాలను పాఠ్యాంశాల్లో చేర్చాలని కోరారు.పాఠశాల కరస్పాండెంట్ తోటకూర యాదయ్య విద్యార్థులు చదువులో పోటీపడి ఉన్నత స్థాయికి చేరాలని ఆకాంక్షించారు. ఈ సందర్భంగా మహిళా ఉపాధ్యాయులను ఘనంగా సన్మానించారు. కార్యక్రమంలో వైస్ ప్రిన్సిపాల్ తోటకూర సంతోష్, ఉపాధ్యాయులు, సిబ్బంది, విద్యార్థులు పాల్గొన్నారు.