పారదర్శకంగా, సజావుగా నిర్వహించాలి.

భువనగిరి, మున్సిపల్ ఎన్నికల కౌంటింగ్ ప్రక్రియను పారదర్శకంగా, ఎటువంటి అంతరాయాలు లేకుండా నిర్వహించేందుకు అన్ని ఏర్పాట్లు పూర్తి చేస్తున్నామని జిల్లా కలెక్టర్ హనుమంతరావు తెలిపారు.బుధవారం మున్సిపల్ ఎన్నికల నేపథ్యంలో భువనగిరి మండలంలోని దివ్య బాల విద్యాలయంలో ఏర్పాటు చేసిన కౌంటింగ్ కేంద్రాన్ని స్థానిక సంస్థల అదనపు కలెక్టర్ భాస్కర్ రావుతో కలిసి ఆయన ప్రత్యక్షంగా పరిశీలించారు. భువనగిరి, చౌటుప్పల్, పోచంపల్లి, యాదగిరిగుట్ట, ఆలేరు, మోత్కూర్ మున్సిపాలిటీలకు సంబంధించిన కౌంటింగ్ ఏర్పాట్లను సమీక్షించారు.ఈ సందర్భంగా కౌంటింగ్ హాల్స్, స్ట్రాంగ్ రూమ్స్, సీసీ కెమెరాల ఏర్పాటు, భద్రతా చర్యలు, టేబుళ్ల అమరిక, సిబ్బంది నియామకాలు వంటి అంశాలను అధికారులను అడిగి తెలుసుకున్నారు. ఎన్నికల కమిషన్ మార్గదర్శకాల ప్రకారం కౌంటింగ్ నిర్వహించాలని స్పష్టం చేశారు. ప్రతి టేబుల్ వద్ద అన్జర్వర్లు, సిబ్బంది అప్రమత్తంగా ఉండాలని సూచించారు.అభ్యర్థులు, వారి ఏజెంట్లకు ఎటువంటి అసౌకర్యం కలగకుండా తాగునీరు, కూర్చునే సౌకర్యం, ప్రాథమిక వైద్య సదుపాయాలు కల్పించాలని ఆదేశించారు. స్ట్రాంగ్ రూమ్స్ వద్ద మూడు అంచెల భద్రత ఏర్పాటు చేసి, అనుమతి ఉన్నవారికే ప్రవేశం కల్పించాలని స్పష్టం చేశారు. కౌంటింగ్ సమయంలో అవాంఛనీయ ఘటనలు జరగకుండా పోలీసులు అప్రమత్తంగా ఉండాలని సూచించారు.కౌంటింగ్ ప్రక్రియను పూర్తిస్థాయి పారదర్శకతతో నిర్వహించి ఫలితాలను సమయానికి ప్రకటించాలని అధికారులను కలెక్టర్ కోరారు.

ఈ కార్యక్రమంలో సంబంధిత శాఖల అధికారులు, సిబ్బంది పాల్గొన్నారు.