మున్సిపల్ ఎన్నికల్లో బీసీలకు మరోసారి అన్యాయం

30 శాతం లోపలే రిజర్వేషన్లతో బీసీలకు నష్టం:56 శాతం రిజర్వేషన్ కల్పించాలి

- బీసీ సంక్షేమ సంఘం జిల్లా అధ్యక్షులు కొత్త నరసింహస్వామి

యాదాద్రి భువనగిరి జిల్లా వ్యాప్తంగా జరుగుతున్న ఆరు మున్సిపల్ స్థానిక సంస్థల ఎన్నికల నామినేషన్లను ఉద్దేశించి బీసీ సంక్షేమ సంఘం జిల్లా అధ్యక్షులు కొత్త నరసింహస్వామి ఒక ప్రకటనలో తీవ్ర ఆవేదన వ్యక్తం చేశారు.జిల్లా వ్యాప్తంగా ఉన్న భువనగిరి,భూదాన్ పోచంపల్లి,యాదగిరిగుట్ట,ఆలేరు,మోత్కూర్ మున్సిపాలిటీలలో జరగనున్న మున్సిపల్ ఎన్నికల్లో అసలైన బీసీలకే తీవ్ర అన్యాయం జరిగే పరిస్థితులు కనిపిస్తున్నాయని ఆయన పేర్కొన్నారు.ఇటీవల జరిగిన గ్రామ పంచాయతీ సర్పంచ్ ఎన్నికల్లోనూ రాష్ట్ర ప్రభుత్వం బీసీలకు తగిన న్యాయం చేయలేదని విమర్శించారు.ఇప్పుడు జరుగుతున్న మున్సిపల్ ఎన్నికల్లో కూడా కేవలం 30 శాతం లోపలే రిజర్వేషన్లు కల్పించడం ద్వారా బీసీలను రాజకీయంగా మరింత వెనక్కి నెట్టే ప్రయత్నం జరుగుతోందని ఆందోళన వ్యక్తం చేశారు.ఇతర కులమతాలకు చెందిన వారితో ప్రేమ వివాహాలు చేసుకున్న వారు కూడా బీసీ మహిళా రిజర్వేషన్లను రాజకీయ ఆయుధంగా వాడుకుంటూ,తరతరాలుగా బీసీ కులవృత్తులపై ఆధారపడి జీవనం సాగిస్తున్న నిజమైన బీసీలకు రిజర్వేషన్లు దక్కకుండా చేస్తున్నారని అన్నారు.బీసీల రాజకీయ,సామాజిక అభివృద్ధి సాధ్యమవ్వాలంటే ప్రభుత్వం వెంటనే 56 శాతం రిజర్వేషన్లు కల్పించాలని డిమాండ్ చేశారు.ఈ అంశంపై ప్రభుత్వాలు,రాజకీయ పార్టీలు మరోసారి గంభీరంగా ఆలోచించాలని కోరారు. బీసీలకు న్యాయం జరగకపోతే ఉద్యమాలు తప్పవని హెచ్చరించారు.