చిట్యాల, కొమిడాల మహేందర్ రెడ్డి

నల్లగొండ జిల్లా చిట్యాల మండలం పెద్ద కాపర్తి గ్రామంలో కోతుల బెడదకు చెక్ పెట్టే దిశగా సర్పంచ్ కాటం వెంకటేశం తొలి అడుగు వేశారు. ఎన్నికల సమయంలో ఇచ్చిన మొదటి హామీని నూతన సంవత్సరంలోనే అమలు చేస్తూ గురువారం ఆంధ్రకు చెందిన నిపుణులను తీసుకువచ్చి కోతులు పట్టే కార్యక్రమాన్ని ప్రారంభించారు.

గ్రామంలో కోతులు విపరీతంగా పెరిగి పంటలు, ఇళ్లకు నష్టం కలిగించడంతో పంచాయతీ పాలకవర్గం, గ్రామ పెద్దలతో చర్చించి ఈ నిర్ణయం తీసుకున్నట్లు సర్పంచ్ తెలిపారు. ఇప్పటివరకు 50కి పైగా కోతులను పట్టినట్లు పేర్కొన్నారు. కోతుల సమస్య పూర్తిగా నివారించి గ్రామాన్ని సురక్షితంగా మార్చడమే లక్ష్యమన్నారు.

ఈ చర్యతో రైతులు, గ్రామస్తులు హర్షం వ్యక్తం చేయగా, చిన్నపిల్లలు–వృద్ధుల్లో నెలకొన్న భయాందోళన తగ్గుతుందని ఆశాభావం వ్యక్తమైంది. వాగ్దానం నిలబెట్టుకున్న సర్పంచ్ కాటం వెంకటేశాన్ని గ్రామ ప్రజలు, ప్రజాప్రతినిధులు అభినందించారు.