నారాయణఖేడ్ స్థానికం ప్రతినిధి కృష్ణ

మహిళా సంఘాల సభ్యులు వ్యాపారవేత్తలుగా ఎదిగి ఆర్థికంగా స్వావలంబన సాధించి సమాజంలో ఉన్నతంగా రాణించాలని సంగారెడ్డి జిల్లా కలెక్టర్ ప్రావీణ్య అన్నారు.మహిళల ఆర్థికాభివృద్ధి, స్వయం ఉపాధి లక్ష్యంగా నారాయణఖేడ్ డివిజన్ పరిధిలోని స్వయం సహాయక సంఘాల సభ్యులు తయారు చేసిన ఉత్పత్తుల ప్రదర్శన మరియు విక్రయ మేళాను ‘మహిళా సంఘాల జాతర’ పేరుతో ఆదివారం నారాయణఖేడ్ రైతు వేదికలో జిల్లా కలెక్టర్ ప్రావీణ్య, నారాయణఖేడ్ శాసనసభ్యులు సంజీవరెడ్డి కలిసి ప్రారంభించారు.ఈ మేళా రెండు రోజుల పాటు నిర్వహించనున్నట్లు అధికారులు తెలిపారు.ఈ సందర్భంగా జిల్లా కలెక్టర్, శాసనసభ్యులు మహిళా సంఘాల సభ్యులు ఏర్పాటు చేసిన వివిధ ఉత్పత్తుల విక్రయ కేంద్రాలను పరిశీలించారు. ఆయా ఉత్పత్తుల తయారీ విధానం, నాణ్యత, విక్రయ విధానాలు, మార్కెటింగ్ అవకాశాలపై మహిళలతో నేరుగా మాట్లాడి వివరాలు తెలుసుకున్నారు.ఈ సందర్భంగా జిల్లా కలెక్టర్ మాట్లాడుతూ, మహిళా సంఘాల ఆర్థిక ప్రగతిని ప్రజలకు చేరువ చేయాలనే లక్ష్యంతో ఇందిరా మహిళా శక్తి పథకం కింద స్వయం సహాయక సంఘాల సభ్యులు తయారు చేసిన నాణ్యమైన ఉత్పత్తులను ఒకే వేదికపై ప్రదర్శించి విక్రయించే విధంగా ఈ మేళాను ఏర్పాటు చేసినట్లు తెలిపారు.ఇందిరా మహిళా శక్తి పథకం ద్వారా రుణాలు పొందిన మహిళలు స్వంత వ్యాపారాలు ప్రారంభించి స్థిర ఆదాయం సాధిస్తున్న విధానాన్ని ప్రజలకు తెలియజేయడమే ఈ మేళా ప్రధాన ఉద్దేశమన్నారు.నారాయణఖేడ్ డివిజన్ పరిధిలోని అన్ని మండలాల మహిళా సంఘాల ఉత్పత్తులు ఈ మేళాలో ప్రదర్శించబడుతున్నాయని, ఇతర మహిళలకు స్ఫూర్తిదాయకంగా నిలిచేలా సేర్ఫ్, మెప్మా సంయుక్త ఆధ్వర్యంలో ఈ కార్యక్రమాన్ని నిర్వహిస్తున్నట్లు వివరించారు.నాణ్యమైన ఉత్పత్తులను కొనుగోలు చేసి మహిళలకు చేయూతనివ్వాలని ప్రజలను కోరారు.ఈ సందర్భంగా శాసనసభ్యులు సంజీవరెడ్డి మాట్లాడుతూ, కోటి మంది మహిళలను కోటీశ్వరులుగా తీర్చిదిద్దడమే ప్రభుత్వ ప్రధాన లక్ష్యమని తెలిపారు. వడ్డీ లేని రుణాలు, బ్యాంకు అనుసంధానం ద్వారా మహిళా సంఘాలకు ఆర్థిక సహాయం అందించి వివిధ వ్యాపారాల్లో రాణించేలా ప్రభుత్వం ప్రోత్సహిస్తున్నట్లు చెప్పారు.మహిళలు సేంద్రియ పంటలు, కూరగాయల సాగు, దుస్తుల తయారీ, ఆహార పదార్థాల తయారీలో మంచి నైపుణ్యం కనబరుస్తున్నారని పేర్కొన్నారు. అయితే ఉత్పత్తుల ప్యాకింగ్, గుర్తింపు చిహ్నాలు, పెద్ద ఎత్తున విక్రయాలపై మరింత దృష్టి సారిస్తే ఆదాయం ఇంకా పెరుగుతుందని, అందుకు అధికారులు చొరవ తీసుకోవాలని సూచించారు. రుణాలు పొందిన మహిళా సంఘాల సభ్యులు ఇతర అవసరాలకు వినియోగించకుండా స్వంత వ్యాపారాలపై పెట్టుబడి పెట్టి స్థిర ఆదాయం పొందే దిశగా ముందుకు సాగాలని అన్నారు.ఈ కార్యక్రమంలో నారాయణఖేడ్ ఉప కలెక్టర్ ఉమా హారతి, జిల్లా గ్రామీణాభివృద్ధి సంస్థ అదనపు ప్రాజెక్టు డైరెక్టర్ సూర్యారావు, తహసిల్దార్లు, సహాయక ప్రాజెక్టు మేనేజర్లు, జిల్లా ప్రాజెక్టు మేనేజర్లు, మహిళా స్వయం సహాయక సంఘాల సభ్యులు తదితరులు పాల్గొన్నారు.