మహా శివరాత్రి ఉత్సవాల సందడిలో వేలాది మంది భక్తులతో కళకళలాడుతున్న శ్రీ రామలింగేశ్వర స్వామి దేవాలయం వద్ద హృదయాన్ని హత్తుకునే ఘటన చోటుచేసుకుంది. భక్తుల రద్దీ మధ్య తల్లిదండ్రుల నుండి వేరుపడిన ఒక చిన్నారిని నూజివీడు రూరల్ ఇన్‌స్పెక్టర్ కె. రామకృష్ణ సమయోచితంగా స్పందించి సురక్షితంగా తల్లిదండ్రుల వద్దకు చేర్చి మానవత్వాన్ని చాటుకున్నారు.

శివరాత్రి సందర్భంగా దర్శనానికి వచ్చిన ఆ చిన్నారి, అనుకోకుండా తల్లిదండ్రుల నుండి దూరమై అపరిచితుల మధ్య భయంతో ఏడుస్తూ కనిపించింది. పరిస్థితిని గమనించిన ఇన్‌స్పెక్టర్ వెంటనే స్పందించి చిన్నారిని దగ్గరకు తీసుకుని ఓదార్చారు. అనంతరం క్షేత్రంలో ఏర్పాటు చేసిన పోలీస్ కంట్రోల్ రూమ్‌కు తరలించి, పబ్లిక్ అడ్రస్ సిస్టమ్ ద్వారా చిన్నారి వివరాలను ప్రకటింపజేశారు.

ప్రకటన విన్న తల్లిదండ్రులు ఆందోళనతో కంట్రోల్ రూమ్‌కు చేరుకుని, సరైన నిర్ధారణ అనంతరం చిన్నారిని తమ చెంతకు తీసుకున్నారు. తమ బిడ్డను సురక్షితంగా అందించిన పోలీసులకు వారు కృతజ్ఞతలు తెలిపారు.

ఈ సందర్భంగా పోలీసులు భక్తులకు పలు జాగ్రత్తలు సూచించారు. రద్దీ ప్రదేశాల్లో పిల్లల చేతులు వదలకూడదని, పిల్లల జేబులో తల్లిదండ్రుల ఫోన్ నెంబర్ ఉంచడం మంచిదని, ఎవరైనా పిల్లలు కనిపించకపోతే వెంటనే పోలీసులకు సమాచారం ఇవ్వాలని కోరారు.