నంద్యాల జిల్లా: కష్టాలు ఎంత పెద్దవైనా, పట్టుదల ఉంటే విజయాన్ని ఆపలేవని మరోసారి నిరూపించింది రుద్రవరం మండలం యల్లావత్తుల గ్రామానికి చెందిన విజయలక్ష్మి. రోజంతా కూలీ పనులు చేసి, రాత్రిళ్లు చదువుకుంటూ చివరకు గ్రూప్–2 పరీక్షలో ఉత్తీర్ణత సాధించి అసిస్టెంట్ సెక్షన్ ఆఫీసర్ (ASO) గా ఎంపికై అనేక మందికి స్ఫూర్తిగా నిలిచింది.పేద కుటుంబంలో జన్మించిన విజయలక్ష్మికి చిన్ననాటి నుంచే జీవితం పోరాటమే. కుటుంబ అవసరాల కోసం కూలీ పనులు చేయాల్సి వచ్చేది. అయితే చదువు ద్వారా జీవితాన్ని మార్చుకోవాలనే లక్ష్యాన్ని ఆమె ఎప్పుడూ వదల్లేదు. రోజంతా శ్రమించి అలసిపోయినా, రాత్రివేళల్లో పుస్తకాలే ఆమెకు తోడయ్యాయి.ఇంతలో కుటుంబానికి మరో పెద్ద దెబ్బ తగిలింది. ట్రాక్టర్ నడుపుతూ కుటుంబాన్ని పోషిస్తున్న ఆమె భర్త ప్రమాదానికి గురి కావడంతో ఆర్థిక సమస్యలు మరింత పెరిగాయి. కుటుంబ బాధ్యతలన్నీ విజయలక్ష్మి భుజాలపై పడ్డాయి. చాలామంది ఇలాంటి పరిస్థితుల్లో ఆశలు వదిలేసే సమయంలో, ఆమె మాత్రం మరింత ధైర్యంగా నిలబడి ముందుకు సాగింది.కుటుంబాన్ని చూసుకుంటూనే చదువుకు సమయం కేటాయిస్తూ, ప్రభుత్వ ఉద్యోగమే లక్ష్యంగా పెట్టుకుని నిరంతర సాధన చేసింది. అనేక ఆటంకాలు ఎదురైనా, చివరకు ఆమె కృషికి ఫలితం దక్కి గ్రూప్–2లో ASOగా ఎంపికయ్యారు.విజయలక్ష్మి విజయం గ్రామ ప్రజల్లో ఆనందాన్ని నింపింది. కూలీ పనుల నుంచి ప్రభుత్వ ఉద్యోగం వరకూ వచ్చిన ఆమె ప్రయాణం గ్రామీణ యువతకు, ముఖ్యంగా ఆర్థిక ఇబ్బందులు ఎదుర్కొంటున్న మహిళలకు గొప్ప స్ఫూర్తిగా మారింది.పరిస్థితులు మనల్ని పరీక్షిస్తాయి.కానీ మన పట్టుదలే మన విజయాన్ని నిర్ణయిస్తుంది” అని విజయలక్ష్మి ప్రయాణం స్పష్టంగా చెబుతోంది.