నారాయణఖేడ్ స్థానికం ప్రతినిధి కృష్ణ

తెలంగాణ ప్రభుత్వం ప్రతిష్టాత్మకంగా చేపట్టిన కోటి మంది మహిళలను కోటీశ్వరులుగా తీర్చిదిద్దే లక్ష్య సాధనలో భాగంగా మహిళలకు స్వయం ఉపాధి అవకాశాలు కల్పించేందుకు వివిధ కార్యక్రమాలు అమలు చేస్తోంది. ఈ లక్ష్యాన్ని సాధించేందుకు స్వయం సహాయక సంఘాల ద్వారా మహిళలకు రుణాలు అందించి ఆర్థిక స్వావలంబన సాధించే దిశగా ప్రభుత్వం చర్యలు చేపడుతోంది.ఈ నేపథ్యంలో నారాయణఖేడ్ మున్సిపల్ పట్టణంలో స్వయం సహాయక సంఘాల సభ్యులు తయారు చేసిన ఉత్పత్తుల ప్రదర్శన మరియు విక్రయ కార్యక్రమాన్ని ‘మహిళా సంఘాల జాతర’ పేరుతో నిర్వహించారు. ఈ కార్యక్రమంలో నారాయణఖేడ్ శాసనసభ్యులు డాక్టర్ పి సంజీవరెడ్డి,సంగారెడ్డి జిల్లా కలెక్టర్ ప్రవీణ్య,

నారాయణఖేడ్ ఉప కలెక్టర్ ఉమా హారతి పాల్గొన్నారు.ఈ సందర్భంగా వారు మహిళా సంఘాల సభ్యులు ఏర్పాటు చేసిన ఉత్పత్తుల ప్రదర్శన కేంద్రాలను పరిశీలించారు. ఉత్పత్తుల తయారీ విధానం, నాణ్యత, విక్రయ విధానాలపై మహిళలతో నేరుగా మాట్లాడి వివరాలు తెలుసుకున్నారు.మహిళలు ప్రభుత్వం అందిస్తున్న అవకాశాలను సద్వినియోగం చేసుకుని స్వంత వ్యాపారాలు ప్రారంభించి ఆర్థికంగా బలపడాలని సూచించారు.అనంతరం వారు నారాయణఖేడ్ పట్టణంలోని గ్రంథాలయాన్ని సందర్శించారు. అక్కడ విద్యార్థులకు అందుబాటులో ఉన్న సదుపాయాలు, ఎదురవుతున్న సమస్యలపై విద్యార్థులను అడిగి తెలుసుకున్నారు. చదువుకు అనుకూలమైన వాతావరణాన్ని మరింత మెరుగుపరిచే దిశగా చర్యలు తీసుకుంటామని తెలిపారు.ఈ కార్యక్రమంలో మున్సిపల్ అధికారులు, సమగ్ర గ్రామీణాభివృద్ధి సంస్థ అధికారులు, మహిళా స్వయం సహాయక సంఘాల సభ్యులు, పలువురు ముఖ్య నాయకులు తదితరులు పాల్గొన్నారు.