చిట్యాల స్థానికం ప్రతినిధి కొమ్మిడాల మహేందర్ రెడ్డి

హైదరాబాద్–విజయవాడ జాతీయ రహదారిపై హైస్పీడ్ హడావుడి.. వరుస ప్రమాదాలు

హైదరాబాద్ నుంచి విజయవాడ వెళ్లే జాతీయ రహదారిపై ఆదివారం తీవ్ర వాహన రద్దీ నెలకొంది. హైవేపై కార్ రేసుల్ని తలపించేలా కొందరు డ్రైవర్లు మితిమీరిన వేగంతో వాహనాలు నడపడం కలకలం రేపింది. ఈ క్రమంలో నల్గొండ జిల్లా చిట్యాల శివారులో వరుసగా ప్రమాదాలు చోటుచేసుకున్నాయి.

చిట్యాల శివారులో ఒకదానికొకటి తాకుతూ మూడు కార్లు వరుసగా ఢీకొన్నాయి. అధిక వేగమే ప్రమాదానికి కారణమని పోలీసులు ప్రాథమికంగా నిర్ధారించారు. ఈ ఘటనతో కొద్దిసేపు ట్రాఫిక్ నిలిచిపోయింది. అదే సమయంలో చిట్యాల టౌన్ పరిధిలో మరో కారు డివైడర్‌ను ఢీకొనడంతో హైవేపై భయానక దృశ్యాలు కనిపించాయి.

ప్రమాదాల్లో కార్లు తీవ్రంగా ధ్వంసమైనప్పటికీ ప్రయాణికులు సురక్షితంగా బయటపడటంతో అందరూ ఊపిరి పీల్చుకున్నారు. సమాచారం అందుకున్న పోలీసులు ఘటనాస్థలికి చేరుకుని ట్రాఫిక్‌ను క్రమబద్ధీకరించారు. ప్రమాదాలకు కారణమైన వాహనాలపై కేసులు నమోదు చేసి దర్యాప్తు చేపట్టారు.

హైవేపై తరచూ జరుగుతున్న ఇలాంటి ఘటనలపై స్థానికులు ఆందోళన వ్యక్తం చేస్తున్నారు. వేగ నియంత్రణ చర్యలు కఠినంగా అమలు చేయాలని, పటిష్టమైన పోలీస్ పర్యవేక్షణ ఏర్పాటు చేయాలని కోరుతున్నారు. అధిక వేగం, నిర్లక్ష్య డ్రైవింగ్ ప్రాణాలకు ముప్పు అని అధికారులు హెచ్చరిస్తున్నారు.