శ్రీ సత్యసాయిజిల్లా, కేంద్రంలోని ప్రశాంతిగ్రామ్ సూపర్ స్పెషాలిటీ ఆసుపత్రి సమీపంలో ప్రధాన రహదారిపై అగ్ని ప్రమాదం చోటుచేసుకుంది.

విద్యుత్ ట్రాన్స్ఫార్మర్ పక్కన ఉన్న విద్యుత్ స్తంభానికి అమర్చిన వైర్లో షార్ట్ సర్క్యూట్ కారణంగా మంటలు చెలరేగాయి. దీంతో స్తంభానికి అమర్చిన ఫ్యూజ్ బాక్సులు, మీటర్లు, విద్యుత్ ట్రాన్స్ఫార్మర్ పరికరాలు పూర్తిగా దగ్ధమయ్యాయి. మంటలు ప్రధాన ట్రాన్స్ఫార్మర్‌కు వ్యాపించకపోవడంతో పెను ప్రమాదం తప్పింది.

సమాచారం అందిన వెంటనే అగ్నిమాపక సిబ్బంది స్థలానికి చేరుకుని మంటలను అదుపులోకి తెచ్చారు. అయితే ఈ ఘటన కారణంగా సూపర్ స్పెషాలిటీ ఆసుపత్రి పరిసర ప్రాంతాల్లో విద్యుత్ అంతరాయం ఏర్పడింది. ప్రమాదంపై సమాచారం అందించినా విద్యుత్ అధికారులు తక్షణం స్పందించకపోవడంపై స్థానికులు తీవ్ర ఆగ్రహం వ్యక్తం చేశారు.