సూర్యాపేట జిల్లా కలెక్టర్ తేజస్ నంద్ లాల్ పవార్

సూర్యాపేట జిల్లా స్థానికం ప్రతినిధి బిక్షం

పాలకవీడు మండలంలో జనవరి 23, 24, 25 తేదీల్లో జరగనున్న జాన్ పహాడ్ దర్గా ఉర్సు మహోత్సవాన్ని విజయవంతంగా నిర్వహించేందుకు అన్ని శాఖల అధికారులు సమన్వయంతో పనిచేయాలని జిల్లా కలెక్టర్ ఆదేశించారు. మంగళవారం పాలకవీడు మండల కేంద్రంలో అన్ని శాఖల అధికారులతో నిర్వహించిన సమీక్షా సమావేశంలో ఆయన పలు కీలక సూచనలు చేశారు. ఈ సందర్భంగా కలెక్టర్ మాట్లాడుతూ, భక్తులకు ఎలాంటి అసౌకర్యాలు కలగకుండా గతంలో మాదిరిగానే ప్రత్యేక చర్యలు తీసుకోవాలని సూచించారు. ముఖ్యంగా మహిళలకు సరిపడా బాత్రూమ్ సదుపాయాలు, త్రాగునీరు, పారిశుధ్యంపై ప్రత్యేక దృష్టి సారించాలని తెలిపారు. ఉర్సు సందర్భంగా ఏర్పాటు చేసే షాపులు, స్పోర్ట్స్, స్టాళ్ల వద్ద ధరల పట్టికలు తప్పనిసరిగా ప్రదర్శించాలని, అధిక ధరలు వసూలు చేయకుండా చర్యలు తీసుకోవాలని అధికారులను ఆదేశించారు. అలాగే శూన్య పహాడ్ రోడ్డును మరమ్మతులు చేయాలని సూచించారు. పోలీస్ శాఖ భక్తులకు వాహనాల రాకపోకల్లో ఇబ్బందులు కలగకుండా ట్రాఫిక్ నియంత్రణ చేపట్టాలని, పార్కింగ్ సౌకర్యాలు ఏర్పాటు చేయాలని తెలిపారు. గ్రామపంచాయతీలు, ఏపీఓలు, ఎంపీడీవోలు పారిశుధ్యంపై ప్రత్యేక శ్రద్ధ వహించాలని, ట్యాంకర్లు, ట్రాక్టర్ల సహాయంతో త్రాగునీటి సరఫరా చేయాలని ఆదేశించారు. విద్యుత్ శాఖ భక్తుల కోసం తగిన లైటింగ్ ఏర్పాట్లు చేయాలని, గంధం ఊరేగింపులో ఎలాంటి ప్రమాదాలు జరగకుండా రోడ్డుకు ఇరువైపులా ఉన్న షాపుల వద్ద భద్రత చర్యలు తీసుకోవాలని తెలిపారు. ఆరోగ్య శాఖ తాత్కాలిక హెల్త్ సెంటర్లు ఏర్పాటు చేసి వైద్య సిబ్బందిని అందుబాటులో ఉంచాలని సూచించారు.

ఈ సమావేశంలో మరుగుదొడ్లు, పారిశుధ్యం, త్రాగునీరు, విద్యుత్ సరఫరా, ఆర్టీసీ బస్సులు, ట్రాఫిక్ నియంత్రణ, అగ్నిమాపక సిబ్బంది, వైద్య సేవలు తదితర అంశాలపై అన్ని శాఖలకు స్పష్టమైన మార్గనిర్దేశం చేశారు. ఈ కార్యక్రమంలో అన్ని శాఖల అధికారులు, కాంగ్రెస్ పార్టీ మండల నాయకులు, స్థానిక ప్రజాప్రతినిధులు, యూత్ సభ్యులు పాల్గొన్నారు.