కుటుంబ సభ్యులకు ఆశీర్వాదం – భక్తులతో కలసి విందు స్వీకరణ

సూర్యాపేట మున్సిపాలిటీ పరిధిలోని 13వ వార్డు గాంధీనగర్‌లో భాదరబోయిన సుధాకర్ నివాసంలో తల్లి ఎల్లమ్మ పండుగను ఘనంగా నిర్వహించారు. ఈ సందర్భంగా స్థానిక నాయకులు, ప్రజాప్రతినిధులు హాజరై కార్యక్రమంలో పాల్గొన్నారు. పండుగ సందర్భంగా ప్రత్యేక పూజలు, హారతులు నిర్వహించగా భక్తులు అధిక సంఖ్యలో హాజరై అమ్మవారిని దర్శించుకున్నారు. కుటుంబ సభ్యులు సంప్రదాయ పద్ధతుల్లో పూజా కార్యక్రమాలను నిర్వహించారు. గ్రామీణ సాంప్రదాయాల మధ్య భక్తిశ్రద్ధలతో సాగిన ఈ వేడుకలో పాల్గొన్న నాయకులు కుటుంబ సభ్యులను ఆశీర్వదించారు.

ఈ సందర్భంగా మాట్లాడుతూ స్థానిక నాయకులు తల్లి ఎల్లమ్మ పండుగ వంటి ఆధ్యాత్మిక కార్యక్రమాలు సమాజంలో ఐక్యతను పెంపొందిస్తాయని తెలిపారు. ఇలాంటి పండుగలు కుటుంబ బంధాలను మరింత బలపరుస్తాయని, సంప్రదాయాలను తరతరాలకు అందించాల్సిన అవసరం ఉందన్నారు. అనంతరం ఏర్పాటు చేసిన విందును స్వీకరించి, కుటుంబ సభ్యులకు శుభాకాంక్షలు తెలిపారు. కార్యక్రమం సౌహార్ద వాతావరణంలో సాగింది. ఈ కార్యక్రమంలో 13వ వార్డు కాంగ్రెస్ పార్టీ బాధ్యుడు కస్పరాజు రమేష్, అర్ధాల మల్లేశ్వరరావు, బాలెమ్ల ఉప్పలయ్య, జెర్రిపోతుల సైదులు, మల్లెపాక బాబు, పోలేపాక సతీషు తదితరులు, స్థానిక కార్యకర్తలు, భక్తులు పాల్గొన్నారు.