నారాయణఖేడ్ డివిజన్‌లో ఎస్‌ఐ, పోలీస్‌ కానిస్టేబుల్‌ ఉద్యోగాల పోటీ పరీక్షలకు సిద్ధమవుతున్న నిరుద్యోగ యువతకు ఉచిత శిక్షణ అందించనున్నట్లు నారాయణఖేడ్ సబ్‌ కలెక్టర్ ఉమా హారతి తెలిపారు. ఈ శిక్షణకు డిగ్రీ పూర్తి చేసి, ప్రస్తుతం నిరుద్యోగులుగా ఉన్న అభ్యర్థులు అర్హులని, మొత్తం 125 సీట్లు అందుబాటులో ఉన్నాయని పేర్కొన్నారు. అర్హత కలిగిన అభ్యర్థులు సెప్టెంబర్‌ 21 నుంచి 26వ తేదీ వరకు ఉదయం 10 గంటల నుంచి సాయంత్రం 5 గంటల వరకు నారాయణఖేడ్‌లోని సంబంధిత కార్యాలయంలో దరఖాస్తులు చేసుకోవాలని సూచించారు. అభ్యర్థుల ఎంపిక కోసం సెప్టెంబర్‌ 28న పరీక్ష నిర్వహించనున్నట్లు తెలిపారు. ఎంపికైన వారికి పోలీస్‌ ఉద్యోగాల పోటీ పరీక్షలకు అవసరమైన అంశాలపై నిపుణులతో ఉచిత శిక్షణ అందించనున్నారు. ఈ అవకాశాన్ని అర్హత కలిగిన నిరుద్యోగ యువత సద్వినియోగం చేసుకుని పోలీస్‌ ఉద్యోగాలు సాధించే దిశగా కృషి చేయాలని సబ్‌ కలెక్టర్ ఉమా హారతి కోరారు.