పెండింగ్‌లో ఉన్న ఫీజు తిరిగి చెల్లింపు, విద్యార్థి వేతనాలు వెంటనే విడుదల చేయాలని డిమాండ్ చేస్తూ ఈనెల 25, 26 తేదీలలో డిగ్రీ, ఇంజనీరింగ్, పీజీ, ఫార్మసీ, బీఈడీ, నిర్వహణ కళాశాలల బంద్‌ను విజయవంతం చేయాలని ప్రజాస్వామ్య విద్యార్థి సంఘం రాష్ట్ర కమిటీ పిలుపునిచ్చింది. జిల్లా కేంద్రంలో నిర్వహించిన విలేకరుల సమావేశంలో జిల్లా అధ్యక్షుడు పుల్లూరి సింహాద్రి, కార్యదర్శి పిడమర్తి భరత్ మాట్లాడుతూ రాష్ట్ర బడ్జెట్‌లో విద్యారంగానికి కేవలం 8.7 శాతం మాత్రమే నిధులు కేటాయించడం తీవ్ర నిరాశ కలిగించిందన్నారు. విద్యార్థుల అవసరాలకు ఇది సరిపోదని తెలిపారు.

పెండింగ్‌లో ఉన్న విద్యార్థి వేతనాలు, ఫీజు తిరిగి చెల్లింపులు విడుదల చేయకుండా ప్రభుత్వం నిర్లక్ష్యంగా వ్యవహరిస్తోందని విమర్శించారు. పేద విద్యార్థులు వీటిపైనే ఆధారపడి చదువుకుంటున్నారని, ప్రైవేటు కళాశాలలు ఫీజులు చెల్లించకపోతే ధృవపత్రాలు ఇవ్వకుండా ఇబ్బందులకు గురి చేస్తున్నాయని పేర్కొన్నారు. విద్యారంగానికి కనీసం 20 శాతం నిధులు కేటాయించాలని, పెండింగ్‌లో ఉన్న మొత్తాలను వెంటనే విడుదల చేయాలని డిమాండ్ చేశారు. లేకపోతే జిల్లాలో ఎమ్మెల్యేలు, మంత్రుల ఇళ్ల ముట్టడికి దిగుతామని హెచ్చరించారు. జిల్లాలోని ప్రభుత్వ, ప్రైవేటు విద్యాసంస్థల యాజమాన్యాలు, ప్రధానోపాధ్యాయులు బంద్‌కు సహకరించాలని కోరారు. ఈ కార్యక్రమంలో జిల్లా నాయకులు సందీప్, మహేష్, వినయ్, నవీన్, పవన్ తదితరులు పాల్గొన్నారు.